Federal rəsmilər Nyu-Yorkun Bruklin ərazisində ABŞ-ın İmmiqrasiya və Gömrük Mühafizə İdarəsinin məmurunun bir kişini güllə ilə vurması ilə bağlı istintaq aparır.
Atışma cümə axşamı səhər saat 8:15-də Bruklinin Bensonhurst məhəlləsində baş verib. Federal rəsmilər həmin an ölkədə qanunsuz yaşamaqda ittiham edilən meksikalı Qasper Avendano-Hernandezi həbs etməyə çalışırdı.
İmmiqrasiya və Gömrük Mühafizə İdarəsinin bildirdiyinə görə, Avendano-Hernandez həbs edilən zaman idarənin iki məmuruna "fiziki hücum" edilib və onlar xəstəxanaya aparılıb. Qarşıdurma zamanı məmurlardan biri Avendano-Hernandezin həbsinə müdaxilə etməkdə günahlandırılan başqa bir şəxsə atəş açıb.
Adı açıqlanmayan həmin şəxsin həyati təhlükəsi olmayan xəsarətlər aldığı bildirilib. Onun silahlı olub-olmadığı isə bəlli deyil.
İmmiqrasiya və Gömrük Mühafizə İdarəsi Nyu York şəhəri polisinin bazar ertəsi Avendano-Hernandezi saxta sənədə sahib olmaq ittihamı ilə həbs etdiyini bildirib.
Atışma prezident Donald Tramp administrasiyası ilə Nyu-York şəhərinin sığınacaq siyasətinə dair mübahisənin kəskinləşdiyi bir vaxt baş verib. İmmiqrasiya və Gömrük Mühafizə İdarəsi son zamanlar şəhərin qanunsuz imiqrantların saxlanması barədəki tələblərini yerinə yetirmədiyindən şikayətlənir.
