Pakistan polisi ölkənin şimal-qərbində üsyançıların polis məntəqəsinə hücumu nəticəsində 10 polis işçisinin həlak olduğunu bildirib. Polisin bildirdiyinə görə, avtomat və qumbaralarla silahlanmış yeddi yaraqlı Kolaçi şəhəri yaxınlığındakı polis məntəqəsinə hücum edib. Hadisə baş verən zaman məntəqədə 17 polis işçisi vəzifə başında olub. Şənbə günü axşam yaraqlılar hücumu davam etdirib və hadisə yerinə təhlükəsizlik qüvvələri çağırılıb. Hücuma görə məsuliyyəti öz üzərinə götürən olmasa da, Pakistandakı Taliban qrupu əl-Qaidə lideri Üsəma bin Ladenin qətlinin qisasını almağa söz verib.
Daha əvvəl Pakistanın şimal-qərb bölgəsində rəqib islamçı qrupun üzvləri arasında toqquşma zamanı 15 yaraqlının qətlə yetirildiyi bildirilmişdi.
