Accessibility links

Navalnı həbsxana xəstəxanasına aparılıb


Rusiya mediasının bildirdiyinə görə, həbsdə olan müxalifət lideri Aleksey Navalnı həbsxana xəstəxanasına aparılıb və ona koronavirus testi edilib. Navalnı xəstəxanaya bazar ertəsi, ağır öskürək və yüksək hərarəri olmasından şikayətləndiyi, eləcə də həbsxanada vərəm xəstəliyi olduğunu iddia etdiyi açıqlamasından bir neçə saat sonra yerləşdirilib.

Navalnının səhhəti ilə bağlı narahatlıqlar iki il həbs cəzasına məhkum edilən və Moskvadan 100 kilometr məsafədəki həbsxanasında saxlanılan müxalifət liderinin keçən həftə təcili tibbi yardımına ehtiyacı olduğunu və bunun üçün aclıq aksiyasına başladığını elan etməsindən sonra yenidən gündəmə gəlib.

“Mənim həkim istəmək və dərman tələb etmək haqqım var. Axmaqlıq ucbatından bunların heç birini almıram” - deyə, Navalnı İnstaqram hesabında aclıq elan etdiyini yazıb.

44 yaşlı Navalnı həmçinin həbsxana rəhbərliyinə göndərdiyi məktubda kürəyində kəskin ağrıların ayaqlarına yayıldığını və bu səbəbdən hissetmə qabiliyyətini itirdiyini yazıb.

Navalnı xəstəliklərinin Qərb dövlətlərinin Rusiya hökumətini günahlandırdığı 2020-ci ilin avqustunda sinir sistemini iflic edən zəhərlənmə ilə əlaqəli olduğunu deyib.

Kreml zəhərlənmə ilə hər hansı əlaqəsi olmadığını bildirib və Navalnının zəhərləndiyinə dair inandırıcı sübutlar olmadığı üçün araşdırmaqdan imtina edib.

Hökumət eləcə də, cəzaçəkmə müəssisəsindəki şəraiti ideal kimi, Navalnının isə xüsusi müalicə almaq üçün simptomları barədə yalan dediyini göstərmək üçün oraya dövlət mediasını göndərib və deyib.

Yerli həbsxana rəhbərliyi də Navalnının lazımi müalicə aldığında israr edib.

Çərşənbə axşamı onlarla tərəfdarı həbsxanaya gedərək, Navalnının lazımi tibbi xidmət göstərilməsini tələb edib. Həkimlər Alyansından Anastasiya Vasilyeva da daxil olmaqla, polis barrikadaları ilə qarşılaşan insanlardan bir neçəsi həbs edilib.

Anastasiya Vasilyeva Navalnının vəziyyəti ilə bağlı onlayn müraciət edən Rusiyanın 1000-dən çox səhiyyə işçisinə qoşulub.

Navalnının müalicəsi ilə bağlı xəbərlərdən narahat olan Fransa Prezidenti Emanuel Makron və Almaniya kansleri Angela Merkel keçən həftə keçirilən video-konfrans zamanı Rusiya Prezidenti Vladimir Putinə Navalnının sağlamlığının qorunmalı olduğu barədə müraciət edib.

Şərhlərə bax

XS
SM
MD
LG