Rusiyanın bazar ertəsi Ukraynaya hava hücumlarının bir hissəsi olaraq atdığı raket paytaxt Kyivdə uşaq xəstəxanasını vurub. Ölkə daxilində raket hücumu azı 31 nəfərin ölümünə və 154 nəfərin yaralanmasına səbəb olub.
“Rusiya terrorçuları növbəti dəfə Ukraynaya qarşı böyük raket hücumu həyata keçiriblər. Müxtəlif şəhərlər - Kyiv, Dnipro, Kriviy Rih, Slavyansk, Kramatorsk," Prezident Volodimir Zelenski deyib.
Zelenski bildirib ki, Rusiya günorta saatlarında hücumu zamanı beş şəhərə müxtəlif tipli 40-dan çox raket atıb, yaşayış binalarını və ictimai infrastrukturu vurub. Ukrayna Hərbi Hava Qüvvələri 30 raketi ələ keçirdiyini bildirib.
Rəsmilər Kyivdə hücum zamanı 7 nəfərin öldüyünü, Ukraynanın mərkəzində Zelenskinin doğulduğu Kriviy Rihda isə 10 nəfərin öldüyünü, 47 nəfərin yaralandığını bildirib.
BMT-nin baş katibi Antonio Quterreş hücumları pisləyərək, Kyiv xəstəxanasına və paytaxtın Dniprovski rayonundakı digər tibb müəssisəsinə edilən zərbələri “xüsusilə şok edici” adlandırıb. Bu barədə təşkilatın sözçüsü Stefan Dujarrik bildirib.
"Mülki əhaliyə və mülki obyektlərə qarşı hücumların həyata keçirilməsi beynəlxalq humanitar hüquqla qadağandır və belə hücumlar qəbuledilməzdir və dərhal dayandırılmalıdır", Düjarrik bildirib.
Diplomatlar bildiriblər ki, BMT Təhlükəsizlik Şurası çərşənbə axşamı Rusiyanın hücumunu müzakirə etmək üçün toplanacaq.
Rusiya Müdafiə Nazirliyi zərbələrin Ukraynanın müdafiə müəssisələri və hərbi hava bazalarına yönəldiyini və uğurlu olduğunu bildirib. Nazirlik hər hansı mülki obyektin hədəfə alındığını rədd edib və heç bir sübut olmadan Kyivdən alınan fotoşəkillərin zərərin Ukraynanın hava hücumundan müdafiə raketi tərəfindən vurulduğunu göstərdiyini iddia edib.
Hücum xəstəxananın boşaldılmasına və müvəqqəti olaraq bağlanmasına səbəb olub. Bəzi analar övladlarını kürəyində daşıyıb, bəziləri isə uşaqları ilə həkimlərin telefonlarına zənglər cavabsız qaldığı vaxt həyətdə gözləyib.
Zelenski xilasedicilərin Kyivdəki Oxmatdit uşaq xəstəxanasında dağıntıları təmizlədiyini, orada ölənlərin sayının hələ məlum olmadığını bildirib.
"Rusiya raketlərinin haraya uçduğunu bilmədiyini iddia edə bilməz və bütün cinayətlərinə görə cavab verməlidir. İnsanlara, uşaqlara, ümumən bəşəriyyətə qarşı. İndi dünyanın buna səssiz qalmaması, Rusiyanın nə olduğunu və nə etdiyini hamının görməsi çox vacibdir", Zelenski X-də deyib.
Kyiv şəhər hərbi administrasiyasının bildirdiyinə görə, Rusiyanın hücumu nəticəsində azı 7 nəfər həlak olub və bir çox rayonda binalara ziyan dəyib.
Kriviy Rih hərbi administrasiyasının rəhbəri Oleksandr Vilkul Rusiyanın Zelenskinin doğma şəhəri Kriviy Riha da hücum etdiyini və orada azı 10 nəfərin öldüyünü, 31 nəfərin yaralandığını bildirib.
Ukrayna Hərbi Hava Qüvvələrinin bildirdiyinə görə, bazar ertəsi ölkənin Hava Hücumundan Müdafiə Qüvvələrinin Çerkassı və Jitomir vilayətləri üzərində üç "Kh-101" qanadlı raketi vurub.
Ukrayna Hərbi Hava Qüvvələri gecə ərzində Rusiyanın hücumuna dördüncü "Kh-101" raketinin, eləcə də iki "İskəndər-M" ballistik raketinin də daxil olduğunu bildirib.
Dnepropetrovsk vilayətinin qubernatoru Serhiy Lısak Telegram kanalında Rusiya qüvvələrinin kamikadze dronları və artilleriya ilə bir neçə kəndə hücum etdiyi, 4 nəfərin yaralandığı və bir sıra binalara ziyan dəydiyi barədə məlumat verib.
Regional hərbi administrasiyanın Telegram kanalında Rusiyanın pilotsuz təyyarələrinin Sumının mərkəzi bölgəsində üç yaşayış məntəqəsinə partlayıcı qurğu atdığı bildirilib.
Rusiya Müdafiə Nazirliyi bazar ertəsi hava hücumundan müdafiə qüvvələrinin Belqorod və Voronej vilayətləri üzərində Ukraynanın iki pilotsuz təyyarəsini məhv etdiyini bəyan edib.
Voronej qubernatoru xəsarət alanların və dağıntıların olmadığını bildirib.
Forum