Accessibility links

Sərhədsiz Reportyorlar: “Mehman Hüseynovu ölüm təhlükəsi gözləyir”


Sərhədsiz Reportyorlar beynəlxalq hüquüq müdafiə təşkilatı həbsxanada olan azərbaycanlı bloger Mehman Hüseynovun səhhətilə bağlı narahatdır. Ona qarşı qaldırılmış yeni uydurma ittihama etiraz olaraq maye qəbul etmədiyinə və yemək yemədiyinə görə vəziyyəti kritikdir. Bu barədə Sərhədsiz Reportyorlar beynəlxalq hüquq müdafiə təşkilatının dekabrın 31-də yaydığı bəyanatda deyilir.

Təşkilat Azərbaycan hakimiyyətini yeni ittihamı götürməyə və blogeri dərhal həbsdən azad etməyə çağırıb.

Mehman Hüseynov Elmar Hüseynovun qəbri önündə
Mehman Hüseynov Elmar Hüseynovun qəbri önündə

"Yeni ittiham barədə ona məlumat verildikdən sonra başladığı aclıq nəticəsində Mehman Hüseynovun səhhəti hər gün pisləşir. O, maye qəbul etmir. 2019-cu ilin martında azaldığa buraxılmalıydı. Ancaq hazırda guya onu həbsxana mühafizəçisini döydüyünə görə əlavə olaraq yeddi il həbs gözləyir," bəyanatda deyilir.

Dekabrın 26-da karserə (cərimə təcridxanası) salındıqdan sonra vəkilləri dekabrın 28-dək ona baş çəkə bilməyiblər. O artıq zəifləyib, kənar yardım olmadan yeriyə bilmir. Vəkilləri bildiriblər ki, dekabrın 30-da ona iynə vurublar, ancaq iynənin mənşəyini aydınlaşdırmalıdırlar.

"Mehman Hüseynovu ölüm təhlükəsi gözləyir və biz onun taleyinə görə məsuliyyəti Azərbaycan hakimiyyətinin üzərinə qoyuruq," Sərhədsiz Repotryorların Şərqi Avropa və Mərkəzi Asiya şöbəsinin rəhbəri Yohan Bir deyib.

"Biz blogerin təcili azad edilməsinə və onun üzərindən yeni ittihamların götürülməsinə çağırırıq. Beynəlxalq birlik bu məqsədə çatmaq üçün mümkün olan hər şeyi etməlidir,", Bir əlavə edib.

Mehman Hüseynov rejimi tənqid etməsi və yüksək səviyyədə korrupsiyanı ifşa etməsilə tanınır.

O həmçinin hakimiyyət tərəfindən dəfələrlə təqiblərə məruz qalmış kütləvi informasiya vasitələrinin müdafiəsilə məşğul olan Reportyorların Azadlıq və Təhlükəsizlik İnstitutunun (RATİ) prezidentidir.

Biz blogerin taleyinə görə məsuliyyəti Azərbaycan hakimiyyətinin üzərinə qoyuruq.
Sərhədsiz Reportyorlar təşkilatı

"Hazırda RATİ-yə onun qardaşı və həmkarı, məcburi mühacirətdə olan Emin Hüseynov rəhbərlik edir. Ötən ilin avqustunda onların anası vəfat etdiyi zaman Mehman Hüseynova onunla son dəfə görüşməyə icazə verməmişdilər", Sərhədsiz Reportyorlar qeyd edir.

Sərhədsiz Reportyorların 2018-ci il üçün Dünya Azadlıq İndeksinə görə, Azərbaycan 180 ölkə arasında 163-cü yeri tutur.

Mehman Hüseynov 2017-ci ilin martında həbs olunub və Nəsimi rayonu polis rəisinin böhtan iddiası əsasında 2 il azadlıqdan məhrum edilib.

Dekabrln 26-da ona qarşı koloniya əməkdaşını döyməsilə bağlı yeni ittiham irəli sürülüb. O, etiraz əlaməti olaraq quru aclıq elan edib.

Hüquq müdafiəçiləri hesab edirlər ki, Mehman Hüseynov yüksək vəzifəli şəxslər arasında korrupsiya farklarını ifşa etdiyinə, həmçinin hakimiyyəti tənqid etdiyinə görə təqib olunur.

Öz növbəsində Azərbaycan rəsmiləri bir qayda olaraq ölkədə fundamental azadlıqların, o cümlədən söz və media azadlığının tam təmin edildiyini bildirir. Yüksək vəzifəli dövlət rəsmiləri insanların qanun qarşısında bərabər olduğunu və heç kimin sözlərinə, fikirlərinə görə həbs edilmədiyini bəyan edir.

XS
SM
MD
LG