İyunun 21-də Azərbaycan-İran sərhədində silahli insident baş verib, bir nəfər Azərbaycan sərhədçisi yaralanıb.
Dövlət Sərhəd Xidmətinin Mətbuat Mərkəzinin məlumatına görə, Cəllilabad rayonunun Bayxanlı kəndinin (Bakıdan 211 kilometr cənub) yaxınlığında dövlət sərhədinin pozulmasına cəhd edilib.
“Sərhəd naryadı tərəfindən İrandan Azərbaycan istiqamətində silahlı şəxslərin hərəkətinin qarşısı alınıb. Sərhəd naryadının qanuni tələbinə və xəbərdarlıq atəşinə tabe olmayan sərhəd pozucuları tərəfindən sərhəd naryadına qarşı silah tətbiq edilib. Baş vermiş hadisə zamanı sərhəd naryadının başçısı Balakən rayonundan həqiqi hərbi xidmətə çağırılmış əsgər Ramazan Kurupov döş qəfəsi, əl və ayaq nahiyələrindən güllə yaraları alıb. Dövlət sərhədini pozmağa müvəffəq ola bilməyən sərhəd pozucuları geri qaçıb”, mətbuat mərkəzi bildirir.
Dövlət Sərhəd Xidmətinin rəisi Elçin Quliyev və digər rəhbər vəzifəli şəxslər əraziyə gedərək hadisə yerinə baxış keçirib.
Fakt üzrə Hərbi Prokurorluq tərəfindən cinayət işi başlanılıb.