Accessibility links

"Sovetski"nin keçmiş sakinləri aksiya keçirib


"Sovetski" sakinləri aksiya keçirib

Sentyabrın 25-də Bakının "Sovetski" adlandırılan məhəlləsinin keçmiş sakinləri Yasamal Rayon İcra Hakimiyyətinin binası qarşısında etiraz aksiyası keçirməyə cəhd edib.

Sakinlər artıq 3 ildir onlara kompensasiya verilməməsindən şikayət edir, icra hakimiyyəti başçısı ilə görüş tələb edib.

"Pulumuzu kəsib özlərinə hündürmərtəbəli binalar tikirlər, bahalı maşınlarda gəzirlər. `Sovetki`nin sakinlərinə `qara insanlar` kimi yuxarıdan aşağı baxırlar. Prezidentə sözümüzü çatdırmışıq, çatdıracağıq da. Bizə xəbərdarlıq etmədən, biz evdə olmadan evlərimizi avadanlıqlarla bir yerdə buldozerin altına verdilər. İndi haqqımız olan kompensasiyanı da vermirlər," etirazçılardan biri deyib.

Polis əməkdaşları etirazçıların bir nümayəndəsinə icra hakimiyyətinin binasına keçməyə icazə verib. Lakin bu, sakinlərin narazılığı ilə qarşılanıb.

"Həmişə eyni adamı buraxırlar, bizim seçdiyimiz nümayəndəni yox. O da gedir, nə danışırsa bizim problemimiz həll olunmur," aksiya iştirakçısı deyib.

Buna baxmayaraq, digər nümayəndələrə binaya daxil olmağa imkan verilməyib.

Polis əməkdaşları etiraza cəhd edənləri ərazidən uzaqlaşdırıb.

Aksiya insidentsiz başa çatıb.

Bakının “Sovetski” deyilən ərazisinin sökülməsinə 2014-cü ildən başlanılıb. 26 hektardan çox sahəni əhatə edən ərazidə 4500-ə yaxın yaşayış və qeyri-yaşayış binaları bir çox hallarda sakinlərlə əldə edilmiş razılığa əsasən satın alınıb və sökülüb.

Söküntü işləri iki mərhələdə aparılıb.

İkinci mərhələ zamanı 1920 evin söküldüyü bildirilir. Bu zaman söküntü işlərinin təqribən 13 hektar ərazini əhatə etdiyi qeyd olunur.

Amma hər iki mərhələdə kompensasiyanın məbləği ilə (hər kvadrata 1500 manat ödənilib) razılaşmayan, söküntüyə dirəniş göstərən ailələr olub. Onlar müxtəlif dövrlərdə aksiyalar keçiriblər. Bununla bağlı bir sıra şikayətlər hətta Avropa İnsan Hüquqları Məhkəməsinə də göndərilib.

XS
SM
MD
LG