Accessibility links

Stoltenberq: İsveç və Finlandiyanın NATO-ya üzvlüyü məsələsində Türkiyə ilə ümumi dil tapacağıq


Almaniyanın xarici işlər naziri Annalena Berbok NATO xarici işlər nazirlərinin Berlində görüşünə video vasitəsilə qatılan NATO-nun baş katibi Yens Stoltenberqin çıxışını dinləyir, 15 may 2022-ci il.

NATO-nun baş katibi Yens Stoltenberq Stokholm və Helsinkinin alyansa qoşulması prosesini mümkün qədər sürətləndirmək istədiyini vurğulayıb.

Stoltenberq bazar günü NATO-nun İsveç və Finlandiyanın alyansa daxil olması məsələsində Türkiyə ilə ümumi dil tapa biləcəyinə əminliyini ifadə edib.

“Əminəm ki, Türkiyənin ifadə etdiyi narahatlıqları üzvlük və ya üzvlük prosesini gecikdirməyəcək şəkildə həll edə bilərik”, Yens Stoltenberq video bağlantı vasitəsilə jurnalistlərə açıqlamasında bildirib.

O, Ankaranın açıqladığı kimi, Skandinaviya ölkələrinin NATO-ya üzv olmaq üçün müraciətinə mane olmaq niyyətində olmadığını deyib.

Bu açıqlama Türkiyə xarici işlər nazirinin İsveç və Finlandiyanın öz ölkələrində terror qruplaşmalarına dəstəyi dayandırmalı, aydın təhlükəsizlik qarantiyaları vermələri və Türkiyəyə ixrac qadağalarını ləğv etməli olduqları barədə çıxışından sonra verilib.

NATO xarici işlər nazirlərinin Berlin görüşündən sonra açıqlama verən Mövlud Çavuşoğlu isveçli və finlandiyalı həmkarları ilə görüşdüyünü və onların Türkiyənin narahatlığını nəzərə almağa çalışdıqlarını bildirib.

Çavuşoğlu Türkiyənin heç kəsi təhdid etmədiyini və təsir vasitələri axtarmadığını, lakin Türkiyə, ABŞ və Avropa İttifaqının terrorçu qrup hesab etdiyi PKK kürd qruplaşmasına İsveçin dəstəyi ilə bağlı öz fikrini bildirdiyini əlavə edib.

Stoltenberq iki ölkənin alyansa daxil olması prosesini mümkün qədər sürətləndirmək istədiyini və NATO-nun bu müddətdə alyansın regionda mövcudluğunun artırılması da daxil olmaqla, təhlükəsizlik qarantiyalarının təmin edilməsi yollarını axtaracağını bildirib.

Finlandiya bazar günü NATO hərbi alyansına qoşulmaq üçün müraciət etmək niyyətində olduğunu rəsmən elan edib. Prezident Sauli Niinisto və baş nazir Sanna Marin NATO-ya üzvlüklə bağlı müraciət haqda Helsinkidə prezident sarayında açıqlama veriblər.

“Bu, tarixi bir gündür”, Niinisto bildirib və “yeni dövr başlayır” – deyə, əlavə edib.

Rusiya prezidenti Vladimir Putin Finlandiya prezidenti Sauli Niinisto ilə şənbə günü telefon söhbəti zamanı Helsinkinin NATO-ya üzv olmaq üçün hər hansı cəhdinin ikitərəfli münasibətlərə zərər verə biləcəyi lə bağlı xəbərdarlıq edib.

XS
SM
MD
LG