Kyivdə şənbə günü minlərlə ukraynalı əllərində bayraqlar küçələrə axışaraq, dövlət himnini səsləndirib, Rusiyanın işğalı ilə bağlı narahatlıq fonunda həmrəyliklərini nümayiş ediblər.
“Panika gərəksizdir. Biz birlik olub, müstəqilliyimiz uğrunda mübarizə aparmalıyıq,” tələbə Maria Şçerbenko deyib. Onun sözləri Ukrayna Prezidenti Volodimir Zelenskinin günün əvvəlində səsləndirdiyi fikrə bənzəyib.
“Mən sakit olmalıyam. Mən Ukraynanı sevirəm,” Şçerbenkonun əlindəki plakatda yazılıb.
Bəzi insanların əllərində üzərinə “müharibə cavab deyil” yazılan plakatlar daşıyıblar. Digərlərinin plakatlarının üzərində isə xalqı “müqavimət” göstərməyə çağıran şüarlar əks olunub.
Moskvanın dəstəklədiyi separatçıların ölkənin şərqində səkkiz ildir 14 mindən çox ölümü ilə nəticələnən münaqişəni davam etdirdiyi Ukrayna indi də Rusiya tərəfindən geniş-miqyaslı işğal təhlükəsi ilə üzləşir.
Kreml qərb qonşusunun ətrafında 100 mindən çox qoşun cəmləşdirib, şimalında Belarus boyu müharibə oyunları aparıb, cənubundakı Qara dənizdə isə donanma təlimləri keçirib.
Vaşinqton xəbərdarlıq edib ki, istənilən gün müharibə başlaya bilər. Qərb ölkələri diplomatlarını Kyivdən geri çəkir, vətəndaşlarını isə dərhal Ukraynanı tərk etməyə çağırırlar.
Hətta Kyiv belə Zelenski və bir sıra başqa liderlərin sakit qalmaq çağırışlarına baxmayaraq paytaxtdakı üç milyon sakini evakuasiya etmək planını hazırlayıb.
“Biz qorxmadığımızı göstərmək üçün buradayıq,” iki uşağı ilə birlikdə Kyivin mərkəzi prospektində yürüşə qatılan Nazar Novoselski bildirib.
“Biz əziz olan azadlığımız uğrunda canımız və bədənimizdən keçəcəyik” - deyə, izdiham dövlət himnindən olan sözləri oxuyub.
Onlar Ukraynada 2014-cü ildə baş verən inqilabdan aylar öncə də kütləvi şəkildə yürüşlər keçirərək bu sözləri oxumuşdular.
2014-cü il inqilabından sonra Kreml Ukraynanın Krım yarımadasını ilhaq etdi və keçmiş sovet respublikasının rusdilli şərq hissəsində qiyamı dəstəklədi.
Moskva ilə Kyiv arasında münasibətlər o zamandən bəri gərgindir. Bu gərginlik izdiham arasında da özünü əks etdirib.
Bir çoxları Qərbin müdafiə alyansı NATO-ya dəstəyini ifadə edib.
Rusiya Prezidenti Vladimir Putin NATO-nun heç vaxt Ukraynaya genişlənməyəcəyinə dair təhlükəsizlik zəmanətləri istəyir, habelə ittifaqın Soyuq Müharibə dövründə Kremlin təsiri altında olan şərqi Avropa ölkələrindən geri çəkilməsini istəyir.
Lakin Ukraynanın yeni konstitusiyasına NATO-ya qoşulmaq vədi daxil edilib və Vaşinqton Kremlin tələblərini rədd edib.
7o yaşlı pensiyaçı Oleksiy Tkaçenkonun əlində tutduğu plakatın üzərində “NATO-ya, dərhal!” sözləri yazılıb.
67 yaşlı həkim Natalia Savostikova isə “Niyə Putin bizə nə edəcəyimizi söyləməlidir?” deyə sual edib.
