ABŞ dövlət katibi Reks Tillerson ABŞ-ın Venesuelanın neft sənayesinə böyük məhdudiyyətlər qoyulmasını ciddi nəzərdən keçirdiyini və prezident Donald Trampın bu barədə qərar verəcəyini deyib.
Camaykanın paytaxtı Kinqston onun beş günlük səfərinin son dayanacağıdır. Ölkənin baş naziri ilə bərabər çıxış edən Tillerson deyib ki, ABŞ bu sanksiyaların regiona təsirini nəzərdən keçirəcək.
“Maduro rejiminə daha çox təyziq göstərmək üçün neft və ya məhsul sanksiyalarının tətbiqinə dair ABŞ-ın gələcəkdə atacağı addımlara gəldikdə, biz bunun regiondakı ölkələrə təsirini də tam nəzərdən keçirəcəyik” - deyə, ABŞ dövlət katibi bildirib.
Tillerson eyni zamanda Karib qonşularının təhlükəsizliyi və rifahının Amerikanın təhlükəsizliyi və rifahı ilə sıx bağlı olduğunu qeyd edərək, ABŞ-ın Camaykaya dəstək göstərəcəyini təsdiqləyib.
