Accessibility links

Trampın keçmiş vəkili 3 illik həbs cəzasına məhkum edilib


ABŞ prezidenti Donald Trampın şəxsi vəkili olmuş Maykl Kohen qızı Samantanın müşayiəti ilə federal məhkəməyə gəlir, Nyu York, 12 dekabr, 2018.

ABŞ prezidenti Donald Trampın uzun zaman şəxsi vəkili olmuş Maykl Kohen çərşənbə günü Nyu York məhkəməsinin hakiminə günahkar olduğunu deməsindən sonra üç illik həbsə məhkum edilib.

Hakim Vilyam Pauli Koheni bir sıra cinayətlərə görə ittiham edərək, onun həbsinə dair hökm çıxarıb. Buraya Trampla intim əlaqədə olduqları deyilən iki qadına 280 min dollar məbləğində pul ödəmək və Konqresə Trampın Moskvada göydələn inşa etmək planları haqda yalan söyləmək daxildir.

Hakim 52 yaşlı Kohenə “əxlaqi dəyərləri” itirdiyini deyib.

ABŞ prezidenti Donald Trampın seçki kampaniyasının keçmiş meneceri Pol Manafort (solda) və vəkili Maykl Kohen
ABŞ prezidenti Donald Trampın seçki kampaniyasının keçmiş meneceri Pol Manafort (solda) və vəkili Maykl Kohen

Kohen həmçinin Trampın 2016-cı il seçki kampaniyası ilə Rusiya arasında mümkün əlaqələrə dair təhqiqat çərçivəsində Trampın daxili çevrəsində ona ən yaxın adamlar arasında həbsə məhkum edilmiş ilk şəxsdir.

12 il Trampın vəkili olmuş Kohen bir zamanlar onu dəstəkləmək üçün “güllə almağa belə hazır olduğunu” deyib. Lakin son zamanlar o, Trampdan üz döndərərək, ona hökm verilən zaman Tramp üçün işləməsinin onun üçün “şəxsi və əqli sıxıntı” olduğunu deyib.

Trampa yaxın daha bir neçə tanınmış fiqur, o cümlədən, onun kampaniyasının keçmiş meneceri və onun ilk milli təhlükəsizlik müşaviri hələlik müxtəlif ittihamlar əsasında məhkum olmayıb.

Kohenin vəkillərinin onun həbs edilməsini istəmədikləri bildirilib. Lakin Kohen bütün cinayətlərə görə məsuliyyəti öz üzərinə götürərək, Trampa olan sədaqətinin onu “qaranlığa apardığını” deyib.

XS
SM
MD
LG