Nüvə təhlükəsizliyinə dair sammitdə iştirak edən Türkiyənin Baş naziri Rəcəp Tayyib Dağlıq Qarabağ Azərbaycan-Ermənistan münaqişəsi, Türkiyə və Ermənistan arasında münasibətlərin normallaşdırılması və İranın nüvə proqramı ilə bağlı açıqlamalar verib.
Baş nazir Erdoğan Qarabağ problemini dünən Rusiya prezidenti Dmitri Medvedevlə müzakirə etdiyini bildirib.
O deyib ki, Azərbaycan olmadan regionda sülh əldə etmək mümkün olmayacaq. Rəcəp Tayyib Ərdoğan Türkiyə və Ermənistan arasında imzalanan sənədin mətnində “regional sülhü bərqərar etmək” ifadəsini qeyd edib.
O deyib ki, İsveçrədə, Sürixdə imzalanan mətndə regional sülhün təmin edilməsi kimi ifadə var. “Regional sülhün təmin edilməsi məsələsində biz Azərbaycanı kənara ata bilərikmi. Azərbaycan da regional sülhün mühüm hissəsidir.” Azərbaycan-Ermənistan arasında münaqişənin çözülməsi, tərəflərin bir razılığa gəlməsi lazımdır-deyə baş nazir Ərdoğan bildirib.