Amerikalı aktyor Uil Smit 50-ci doğum gününü qeyd etmək üçün yeni yüksəkliklər fəth edib.
Smit çərşənbə axşamı Arizona ştatının cənub-qərbindəki Böyük Kanyon yaxınlığında vertolyotdan uğurlu şəkildə tullanış edib.
Smit bildirib ki, bu tullanışı insanları komfort zonasından çıxmağa həvəsləndirən ''Yes Theory'' adlı YouTube kanalının çağırışına görə edib.
Tullanışı izləmək istəyən insanlar online lotereyaya qoşulmalı olub. Tədbirin təşkilatçılarının sözlərinə görə, lotereyadan əldə olunan pul iqtisadi çətinliklərin yaşandığı ölkələrdə uşaqların təhsil almasına kömək etmək üçün istifadə olunacaq.
