Ukrayna prezidenti Volodimir Zelenski çərşənbə günü Çin lideri Si Cinpinlə "uzun və mühüm" telefon söhbəti apardığını bildirib. Liderlər Rusiyanın Ukraynadakı müharibəsini dayandırmasına dair danışıqlara vasitəçilik etmək üçün ilk mümkün addımın Pekinə və Kyivə elçilər göndərməklə bağlı razılığa gəlib.
Zelenski Twitter səhifəsində yazdığı şərhində 14 ay əvvəl Rusiyanın işğalından sonra Si ilə ilk söhbətinin təfərrüatını açıqlamayıb. Lakin Ukrayna lideri "İnanıram ki, bu çağırış, eləcə də Ukraynanın Çinə səfir təyin etməsinin ikitərəfli münasibətlərimizin inkişafına güclü təkan verəcək" deyib.
Çin dövlət mediasının məlumatına görə, Si Zelenskiyə Rusiya və Ukrayna arasında danışıqlar üçün müraciət edərək, "nüvə müharibəsində qalib yoxdur" deyə, xəbərdarlıq edib. Dövlət televiziyası bildirib ki, Si hökuməti mümkün siyasi həlllə bağlı danışıqlar aparmaq üçün Ukraynaya xüsusi nümayəndə heyəti göndərəcək.
Dövlət televiziyası Sinin Zelenskiyə verdiyi şərhlərə dair reportajda "Danışıqlar yeganə çıxış yoludur. Bütün maraqlı tərəflər nüvə problemi ilə bağlı sakit və təmkinli olmalı, özlərinin və bütövlükdə bəşəriyyətin gələcəyi və taleyi ilə yaxından əlaqələnməli, böhranı idarə etmək üçün birlikdə çalışmalıdırlar".
Çin keçən ilin fevral ayında atəşkəs və sülh danışıqları təklif edərək, Rusiyanın işğalına qarşı neytral qalmağa çalışıb. Lakin Pekin Rusiyanın işğalını pisləməkdən, o cümlədən Moskvanı qoşunlarını 2014-cü ildə qanunsuz ilhaq etdiyi Krımdan çıxarmağa çağırmaqdan imtina edib.
Zelenski dəfələrlə deyib ki, onun hökuməti Rusiya qoşunlarını bütün Ukraynadan çıxarana qədər Moskva ilə sülh danışıqlarına getməyəcək.
Keçən ay Si Pekinin qlobal liderlik iddiasını vurğulayaraq, Moskvaya üç günlük rəsmi səfər edib. Danışıqların sonunda Si və Rusiya prezidenti Vladimir Putin ölkələri arasında "sərhədsiz dostluq" olduğunu bəyan edib. Ondan sonra Putin Kremldə Çinin müdafiə rəsmiləri ilə də görüşüb.
