Ukrayna rəsmilərinin bildirdiyinə görə, Donetsk şəhərində trolleybusa atılan qumbara azı 13 nəfərin ölümünə səbəb olub. Hücumda həm Ukrayna, həm də Rusiya günahlandırılır.
Ukraynanın baş naziri Arseniy Yatsenyuk hökumətin veb səhifəsində dərc etdiyi bəyanatında Ukrayna ordusu ilə Rusiya tərəfdarı separatçıların döyüşdüyü şəhərin mərkəzində həyata keçirilən hücumda Rusiya terrorçularını günahlandırıb.
Rusiyanın xarici işlər naziri Sergey Lavrov Ukrayna ordusunu günahlandıraraq, bunun provokasiya və bəşəriyyətə qarşı cinayət olduğunu deyib.
Bu arada Ukraynanın hərbi rəsmiləri aylarla nəqliyyat sistemini nəzarətdə saxladıqdan sonra ordunun Donetsk aeroportundan çıxarıldığını bildirib. Rusiya tərəfdarı separatçılar aeroportun nəzarətini ələ keçirmək uğrunda qızğın döyüşlər aparıb.