ABŞ Dövlət Departamentinin çərşənbə axşamı bildirdiyinə görə, ABŞ-la Rusiya arasında COVID-19 pandemiyası zamanı dayandırılmış və Rusiyanın Ukraynaya hücumuna görə ləngiyən nüvə silahlarına nəzarət yoxlamalarının bərpası ilə bağlı danışıqlar tezliklə bərpa olunacaq.
Dövlət Departamentinin sözçüsü Ned Prays deyib ki, təftişlərlə bağlı danışıqlar "yaxın gələcəkdə" "New START" müqaviləsinin şərtlərinə əsasən aparılacaq və Ukraynadakı münaqişə müzakirəyə daxil olmayacaq.
O, danışıqların tarixini və ya yerini açıqlamasa da, digər rəsmilər danışıqların çox ehtimal ki, ilin sonuna qədər Misirdə keçiriləcəyini təxmin edir.
Müqavilənin "İkitərəfli Məşvərət Komissiyası" adlanan iclası bir ildən artıq müddətdən sonra ilk dəfə keçiriləcək. İclas digər fikir ayrılıqlarına baxmayaraq, iki ölkənin silahlara nəzarət və kommunikasiya xətlərinin açıq saxlanmasına sadiq qaldığını göstərmək məqsədi daşıyır.
"Biz bütün dünyada transformasiya gücünə, diplomatiya və dialoqun əhəmiyyətinə dərindən inanırıq" Prays Vaşinqtonda jurnalistlərə deyib. O, Bayden administrasiyasının görüşün nəyə nail ola biləcəyi barədə "realist" olduğunu vurğulayıb.
"New START" müqaviləsi çərçivəsində ABŞ və Rusiya hərbi obyektlərinin təftişi 2020-ci ilin martında koronavirusun yayılması səbəbindən hər iki tərəf tərəfindən dayandırıldı. Komitə sonuncu dəfə 2021-ci ilin oktyabrında toplaşsa da, lakin Rusiya ABŞ-ın Ukraynaya dəstəyinə etiraz olaraq, avqust ayında müqavilənin təftiş müddəaları ilə əməkdaşlığı birtərəfli qaydada dayandırıb.
"Biz Rusiyaya aydın şəkildə başa saldıq ki, onun Ukraynaya qarşı əsassız müharibəsi nəticəsində tətbiq edilən tədbirlər rusların və Rusiya müfəttişlərinin ABŞ-da "New START" müqaviləsi üzrə yoxlamalar aparmasına mane olmur. Ona görə də biz ümid edirik ki, BCC-nin iclası həmin yoxlamaları davam etdirməyə imkan verəcək" , Prays bildirib.
