ABŞ-ın vitse-prezidenti Kamala Harris Qəzzada "dərhal atəşkəs" çağırışından bir gün sonra bazar ertəsi Ağ Evdə İsrailin Hərbi Nazirlər Kabinetinin üzvü Benni Qantzla görüşü planlaşdırılır.
Ağ Ev rəsmisinin bildirdiyinə görə, görüş zamanı fələstinli mülki əhali arasında itkilər, müvəqqəti atəşkəsin təmin edilməsi, girovların azad edilməsi, eləcə də anklava yardımın artırılması məsələlərinin müzakirə ediləcəyi gözlənilir.
"Vitse-prezident Rəfahdakı 1,5 milyon insanın təhlükəsizliyi ilə bağlı narahatlığını ifadə edəcək" - deyə, rəsmi bildirib. O, İsrailin "HƏMAS-ın terror təhdidləri qarşısında özünü müdafiə etmək hüququnun" olduğunu əlavə edib.
Qantz verdiyi açıqlamada Harris, Ağ Evin milli təhlükəsizlik müşaviri Ceyk Sallivan və Konqresin Respublikaçı və Demokrat üzvləri ilə görüşəcəyini təsdiqləyib.
Harrisin bazar günü çıxışı zamanı Bayden administrasiyasının müharibəni dayandırmaq üçün ən güclü çağırışlarından birini edərək, atəşkəsə çağırıb.
Harrisin Alabama ştatının Selma şəhərində vətəndaş hüquqları uğrunda yürüşün ildönümününə həsr edilmiş toplantıda "Qəzzada iztirabların miqyası nəzərə alınaraq, dərhal atəşkəs olmalıdır," sözləri gurultulu alqışlarla qarşılanıb.
Harris həmçinin izdiham qarşısında "HƏMAS-ın İsrail xalqı üçün yaratdığı təhlükə aradan qaldırılmalıdır" deyib.
ABŞ administrasiyası Həmas tərəfindən saxlanılan qalan girovların azad edilməsi və BMT-nin aclıq təhlükəsi ilə bağlı xəbərdarlıq etdiyi Qəzza zolağına yardımı artırmaq üçün Misir və Qətərlə birlikdə döyüşlərə altı həftəlik fasilə vermək üzərində işləyir.
Forum