Ictimai Palatanın 2011-ci il aprelin 2-də keçirdiyi mitinqi ilə bağlı məhkum olunmuşlardan biri, Müsavat Partiyasının üzvü Elşən Həsənov fevralın 22-də vaxtından əvvəl şərti azadlığa buraxılıb. Cənab Həsənov ictimai asayişin pozulmasında ittiham olunaraq 2 il müddətinə azadlıqdan məhrum edilmişdi. Sonradan Apellyasiya Məhkəməsi bu müddəti 1 ilədək azaldıb.
Hüquq müdafiəçisi Eynulla Fətullayev bildirib ki, E.Həsənov hepatit C-dən əziyyət çəkib. Onun azadlığa çıxmasına bir aydan bir qədər çox vaxt qalırdı. Hüquq müdafiəçisi ümidvar olduğunu bildirib ki, 2 aprel mitinqi ilə əlaqədar məhkum edilənlər və digər siyasi məhbuslar tezliklə azadlığa buraxılacaq.
Hazırda beynəlxalq hüquq müdafiə təşkilatları tərəfindən vicdan məhbusu kimi tanınan 15 nəfər həbsdədir.