"Azkataloq" Azərbaycan tarixi foto və sənədlərinin onlayn kataloqudur. Layihə dizayner Rəsul Həsən tərəfindən yaradılıb. Layihənin məqsədi ölkənin foto və sənəd xronikasını yaratmaq, müxtəlif muzey, qalereya, şəxsi arxiv və kolleksiyalarda olan məlumatları vahid platformaya toplamaqdır. Sayt iki dildə - Azərbaycan və ingilis dilində fəaliyyət göstərir. Layihə izləyicilərə pulsuz formada təqdim edilir. Rəsul Həsən deyir ki, layihənin əsas məqsədi Azərbaycan tarixinin şəkillər vasitəsilə məşhurlaşdırılması, Azərbaycan foto sənətinin və müxtəlif mənbələrin (foto kolleksiyası və sənəd sahibləri) tanıdılmasıdır. Qrafik dizayner bildirir ki, online kataloqda yerləşdirilən fotolar tədqiqatçıların, tarixçilərin, ümumiyyətlə istənilən hər bir kəsin istifadəsi üçün yüksək keyfiyyətdə yerləşdirilir və təmizlənir. Rəsul Həsən 10 ildən çoxdur ki, qrafik dizaynla məşğul olur. O, həmçinin, "Qrafik dizaynın əsasları" kitabının müəllifidir. Rəsul Həsən düşünür ki, qrafik dizayn sahəsində elmi ədəbiyyatın olmaması ciddi problemdir.