Cənubi Koreya ordusunun məlumatına görə, Şimali Koreya çərşənbə axşamı səhər bir cüt qanadlı raket buraxıb. Bu Pxenyanın yeni ildə beşinci raket sınağıdır.
Cənubi Koreyanın Yonhap xəbər agentliyinin verdiyi məlumata görə, raketlər daxili ərazidən atılıb və Koreyanın şərq sahillərində dənizə düşüb.
Cənubi Koreya ordusu Amerikanın Səsinə göndərdiyi mesajda raketin buraxılışını təsdiqləyərək, rəsmilərin hələ də ətraflı təhlil apardığını bildirib.
Bu il Şimali Koreya beş ayrı buraxılış zamanı səkkiz raket atıb. Ötən həftə Şimali Koreya da uzun mənzilli raket və nüvə sınaqlarını bərpa etməklə hədələyib.
Birləşmiş Millətlər Təşkilatının Təhlükəsizlik Şurasının bir sıra qətnamələri ilə Şimali Koreyaya hər hansı ballistik raket fəaliyyəti, o cümlədən istənilən məsafədən buraxılışlar qadağan edilib. Bununla belə, qətnamələr qanadlı raket sınaqlarını qadağan etmir.
Şimali Koreya bu yaxınlarda ABŞ-ın “düşmənçilik siyasəti” adlandırdığı siyasətdən narazılığını bildirib. Pxenyan xüsusilə, ABŞ-Cənubi Koreya hərbi əməkdaşlığı ilə bağlı məsələ qaldırılıb.
Birləşmiş Ştatların Cənubi Koreyada təxminən 28 min əsgəri var. Bu, sülh müqaviləsi ilə deyil, atəşkəslə başa çatan 1950-ci illərin Koreya müharibəsinin nəticəsidir.
ABŞ prezidenti Co Baydenin hakimiyyəti dövründə Vaşinqton müntəzəm olaraq Şimali Koreya ilə ilkin şərt olmadan danışıqlara açıq olduğunu bəyan edib.
"Onlar bunu irəli aparmaq istəyini nümayiş etdirməyiblər" – deyə, Pentaqonun sözçüsü Con Kirbi bazar ertəsi mətbuat brifinqində deyib.
Kirbi ABŞ-ın Şimali Koreyanın “nüvə ambisiyaları və ballistik raket imkanlarını inkişaf etdirməsi” ilə bağlı narahatlığını təkrarlayıb.
“Biz bunu qınamağa və Şimalı bu təxribatları dayandırmağa, beynəlxalq hüquqa və Təhlükəsizlik Şurasının bu qətnamələrinə əməl etməyə və gərginliyi azaltmaq üçün yollar tapmağa çağırmağa davam edirik” – deyə, o qeyd edib.
