Azərbaycanda insanlar son zamanlar sağlamlıqları ilə əlaqədar sualları Facebook-da populyarlıq qazanmış tibbi qruplarda paylaşaraq, pulsuz şəkildə müəyyən onlayn konsultasiya ala bilirlər. Bir sıra onlayn tibbi konsultasiya qruplarının arasında artıq 5 ildir ki aktiv olan Med Prosvetin fəaliyyəti ilə digərlərindən fərqlənir. Layihənin təsisçisi, doktor Zaur Orucov xüsusi olaraq vurğulayır ki, qrupun təməl məqsədi onlayn konsultasiya vermək yox, tibbi maarifləndirmə aparmaqdır. Onun sözlərinə görə, komanda olaraq, onlar insanları sadə dildə elmi məlumatlandırmaq və tibblə əlaqəli mifləri dağıtmağı qarşılarına məqsəd qoyub.