ABŞ diplomatı bazar ertəsi bildirib ki, Birləşmiş Ştatlar Ukraynanın paytaxtı Kyivdəki səfirliyini tezliklə yenidən aça bilər.
Müvəqqəti işlər vəkili Kristina Kvien Kyivdə mətbuat konfransı zamanı bildirib ki, ABŞ hələ də hər hansı yenidən açılmazdan əvvəl təhlükəsizlik mütəxəssislərinin qərarını gözləyəcək.
Kvien bildirib ki, ABŞ diplomatları yaxın bir neçə həftə ərzində Ukrayna paytaxtına bir günlük səfərlər etməyə başlayacaq.
"Biz geri qayıtmaqdan məmnunuq və Ukraynanın bu müharibədə qalib gəlməsinə yardım məqsədi ilə burada mümkün olan hər şeyi etmək üçün səylərimizi davam etdirəcəyik. Mən deyərdim ki, Rusiyaya mesaj budur ki, siz uğursuz oldunuz. Ukrayna hələ də ayaqdadır" - deyə, Kvien əlavə edib.
Fevralın 24-də Rusiyanın Ukraynanı işğal etməsindən təxminən iki həftə əvvəl ABŞ səfirliyi bağlanıb. Bazar günü ABŞ dövlət katibi Antoni Blinken bəzi amerikalı diplomatların ölkənin qərb hissəsində Lvivə səfərlərə başlayacağını bildirib.ABŞ-ın Ukraynadakı diplomatik fəaliyyətinin bərpası xəbəri ABŞ rəsmilərinin, o cümlədən Nümayəndələr Palatasının spikeri Nensi Pelosinin ölkədə bir neçə yüksək səviyyəli görüşlərdən sonra yayılıb.