Fici məhkəməsi Rusiyaya məxsus super yaxtanın Sakit okean ada ölkəsindən ABŞ tərəfindən çıxarılmasına qərar verib. Belə ki, Ficinin gəmini saxlaması pul itkisinə səbəb olub.
ABŞ Ədliyyə Nazirliyinin KleptoCapture İşçi Qrupu Ukraynada müharibə ilə bağlı Rusiya prezidenti Vladimir Putinə təzyiq göstərmək məqsədilə rusiyalı oliqarxlarının yaxtaları və digər dəbdəbəli aktivlərinin müsadirə edilməsinə diqqət yetirib.
106 metrlik "Amadea" Meksikadan 18 günlük səyahətdən sonra aprelin 13-də Ficiyə çatıb.
Keçən ay ölkənin Ali Məhkəməsi yaxtanın sanksiyaya məruz qalmış rusiyalı oliqarx Süleyman Kərimovla əlaqəli olduğuna dair ABŞ-a orderi verdikdən sonra Fici səlahiyyətliləri tərəfindən ələ keçirilib.
FTB 300 milyon dollar dəyərində olan lüks gəminin ildə 25-30 milyon dollarlıq istismar xərcləri olduğunu və ABŞ-ın gəminin ələ keçirildikdən sonra saxlanması üçün pul ödəyəcəyini bildirib.
Bununla belə, gəminin qeydiyyatdan keçmiş sahibi Millemarin Investments-in müraciətinə Fici məhkəmələrində baxılarkən Fici hökuməti yaxtanın xərclərini ödəyib.
Çərşənbə axşamı Ali Məhkəmə qərara alıb ki, ictimai maraq yaxtanın "Fici sularından çıxmasını" tələb edir, çünki qərara əsasən, onun Ficidə dayanması "Fici hökumətinə baha başa gəlir". Gəmi "heç bir icazə olmadan və çox güman ki, ABŞ-ın təqibindən yayınmaq üçün Fici sularına üzüb".
Birləşmiş Ştatlar Kərimovun "Amadea" gəmisinə sahib olduğunu iddia edir, baxmayaraq ki, gəminin vəkilləri bunu təkzib edərək, məhkəməyə gəminin başqa bir rusiyalı oliqarx, Rusiyanın enerji nəhəngi "Rosneft"in keçmiş rəhbəri Eduard Xudainatova məxsus olduğunu və ona sanksiya tətbiq edilmədiyini bildirib.
Keçən ay Xudainatova məxsus dəyəri təxminən 700 milyon dollar olan daha bir lüks yaxta İtaliyada polis tərəfindən saxlanılıb.
Federal Təhqiqatlar Bürosunun verdiyi məlumata görə, həbs orderində "Amadea" Rusiya qüvvələri Ukraynaya daxil olduqdan sonra fevralın 24-də onun avtomatlaşdırılmış izləmə sistemini söndürərək tutulmamağa çalışıb.
Gəminin vəkili Feizal Haniff hökmü şərh etməkdən imtina edib.
"Qərar Ficinin beynəlxalq qarşılıqlı yardım sorğularına və Ficinin beynəlxalq öhdəliklərinə hörmət öhdəliyini qəbul edir" - deyə, Fici Dövlət Prokurorluqları Direktoru Kristofer Prayd bildirib.
Onun sözlərinə görə, məhkəmə "çirkli pulların yuyulması və mülkiyyətlə bağlı məsələlərin" ilkin ABŞ məhkəməsində həll edilməsinin vacibliyi ilə razılaşıb.
O deyib ki, "Amadea" ABŞ səlahiyyətlilərinə təhvil verilir və Ficini tərk edəcək.
ABŞ-ın Suvadakı səfirliyi şərh sorğusuna hələ cavab verməyib.
Superyacht Times saytına görə, rusiyalılar təxminən hər 10 super yaxtadan birinə sahibdir. Roman Abramoviçin Eclipse və Solaris kimi sanksiyaya məruz qalan şəxslərə məxsus olan yaxtaların bəziləri təhlükəsiz limanlarda saxlanılır və ya sanksiya tətbiq edən dövlətlərin yurisdiksiyasından kənardakı beynəlxalq sularda üzür.
