Çin Kommunist Partiyası bazar günü Pekində mühüm siyasi toplantı keçirəcək Ölkə lideri Si Cinpinin partiyanın baş katibi kimi görünməmiş üçüncü beş illik müddətə təsdiqlənəcəyinə şübhə yoxdur.
On ildə iki dəfə keçirilən bu liderlik görüşü üçün xarakterik olduğu kimi Pekindəki səlahiyyətlilər hər şeyin rəvan getməsini təmin etmək üçün təhlükəsizliyi gücləndirib, yolları bağlayıb və patrulları artırıb.
Lakin bu, bəzi çinlilərin uzunmüddətli həbs cəzası riski ilə çıxış etməsinə mane olmayıb.
Cümə axşamı günü kimsə Pekinin şimal-qərbindəki Haidian rayonundakı böyük şəhər estakadasında qırmızı simvolları olan böyük ağ plakatlar asıb. Plakatlarda Si "diktator" adlandırılıb, tələbələr və işçilər tətilə çağırılıb. Digər plakatlarda Çinin sərt sıfır-COVID siyasətinə etiraz edilib.
Bunlara əlavə olaraq, mesajlarına daha çox diqqət çəkmək üçün plakatları asan hər kəs tərəfindən yandırılan kiçik yanğından tüstü qalıb. Ekran görüntüləri Çində tez bir zamanda onlayn bloklanıb. Çinin sosial media tətbiqi WeChat-da video və şəkillər paylaşan şəxsi söhbət qrupları bağlansa da, məzmun Çində bloklanan Twitter-də paylaşılmağa və yayılmaqda davam edib.
Pekində plakatlarda yazılmış ifadələr arasında: "Biz PCR testlərini istəmirik, yemək istəyirik". Digəri: "Biz Mədəni İnqilab istəmirik, islahatlar istəyirik."
Xaricdəki demokratiya müdafiəçilərindən Partiya Qurultayının nümayəndələrinə göndərilən "Si Çinpinə istefa ərizəsi” adlı dörd səhifəlik açıq məktub göndərilib. Müraciətdə Sinin səlahiyyətlərindən sui-istifadələri, o cümlədən COVID-in yayılmasının ilkin olaraq gizlədilməsi, Tayvana qarşı hərbi təhdidlər, onun Honq-Konqda insan hüquq və azadlıqlarına qarşı təzyiqləri barədə ətraflı məlumat verilib.
Avstraliya Yayım Korporasiyasının Şərqi Asiya müxbiri Bill Birtles tərəfindən Twitter-də paylaşılan yerüstü keçiddəki mənzərənin bir videosu polisin plakatları çıxarmağa tələsdiyini və yanğını söndürmək üçün yanğınsöndürən maşınının gəldiyini göstərir.
Birtles yazısında bildirib: "Başqa yerdə belə kiçik bir etiraz o qədər də diqqət çəkməyə dəyməzdi, ancaq Pekində..."
Sinin sərt COVID siyasəti və virusun yayılmasını dayandırmaq üçün tez-tez qapanmalar Çin iqtisadiyyatına ağır zərbə vurub və bu, görüşlər ərəfəsində artan ictimai narazılıq mənbəyidir. Bu həftənin əvvəlində Kommunist Partiyasının qəzeti "People’s Daily" ictimaiyyəti ölkənin sərt sıfır-COVID siyasətinə səbirli olmağa çağıran bir yazı dərc edib.
Məqalədə deyilir: "Epidemiya ilə mübarizədə inam qızıldan daha mühümdür". Daha sonra ölkənin pandemiyaya yanaşmasının "elmi" olduğunu və ölkənin "milli şərtlərinə" uyğun olduğu iddia edilib.
Çinin Twitter-ə bənzər sosial media platforması Weibo-da tənqidi şərhlər bloklansa da, bəziləri yayılıb.
Məşhur bir yazıda bir istifadəçi zarafat edib ki, "People's Daily"də ilk olaraq sıfırlanan şey vebsaytın şərh bölməsidir.
Başqa biri yazıb: Qəzetdə şərh bildirmək mümkün deyilsə, o zaman xalq kimdir və xalqı kim təmsil edir"?
