Nyu-Yorkdan orqan transplantasiyası cərrahı üçüncü dəfə Ukraynaya səfər etməyi planlaşdırır. O, Rusiyanın Ukrayna ilə müharibəsində əsir düşən xəstələrə yardım məqsədi ilə yerli həkimlərlə işləyir. Cərrah Robert Montqomeri həm də Lvivdəki xəstəxana üçün tibbi avadanlıq almaq üçün pul toplayır.
Dr. Robert Montqomeri bir gündə on böyrək nəqli ilə beynəlxalq diqqəti cəlb edən bir cərrahdır. O, 2000-dən çox böyrək transplantasiyası əməliyyatı həyata keçirib. Doktor 2022-ci ilin yazında Rusiyanın Ukraynanı işğal etməsindən qısa müddət sonra oradakı xəstələrə kömək etmək qərarına gəlib.
"Mənə rəğbət göstərmək və ya bu barədə danışmaq kifayət etmirdi. Bu, birbaşa iştirak tələb edən şeylərdən biri idi".
Polşalı həmkarının köməyi ilə Montqomeri cərrahiyyə əməliyyatlarını yerinə yetirmək üçün Ukraynaya getməyi təklif edən ukraynalı transplantoloqlarla onlayn görüş keçirib.
"Lvivə çatanda bütün işıqlar sönmüşdü; Ertəsi gün səhər biz iki transplantasiya etdik. Əvvəlcədən planlaşdırılmışdı. Beləliklə, biz bir neçə saat yatdıq, sonra işə başladıq".
Ukraynalı transplantasiya cərrahı, Montqomerini ilk olaraq Ukraynaya dəvət edən həkim İhor Humennyi onun müharibə zonasında olmaqdan qorxduğunu soruşub.
"Onun cavabını çox yaxşı xatırlayıram. Dedi: Bilirsən ki, mən özüm ürək transplantasiyası əməliyyatı keçirmişəm. Yeni bir ürək əldə edəndən bəri yaşamaq üçün əlavə vaxtım olduğunu başa düşdüm. Bu vaxtdan ehtiyacı olan insanlara kömək etmək üçün istifadə etmək istəyirəm".
Montqomeri bir həftə Lvivdə qalır və dörd transplantasiya əməliyyatı həyata keçirir. Onların hamısı uğurlu olur. Cərrah deyir ki, kömək üçün başqa yollar da tapıb.
"Orada olduğum müddətdə faydalana biləcəyimiz yeni alətlər və avadanlıqların siyahısını tuturdum. Beləliklə, bütün bunları yazdım. Belə ki, ABŞ-a qayıdanda bir az pul yığa bilərəm".
ABŞ-a qayıtdıqdan sonra o, təxminən 300 000 dollar toplaya bilib. Onun klinikası Ukrayna xəstəxanaları üçün avadanlıq alır. O, 2022-ci ilin oktyabrında Ukraynaya ikinci səfərini edib. Doktor deyir ki, enerji və digər infrastruktur obyektlərinin davamlı atəşə tutulması işi çox stresli etməklə yanaşı, çətinlik yaradırdı.
"İşıqlar sönür; generatorlar işə düşməlidir. Qaranlıqda və ventilyatorlar işləmir, EKQ aparatları dayandıqda dəhşətli bir keçid baş verir. Bu, belə şəraitdə işləmək dəhşətlidir".
İndi Montqomeri protez və psixoloji müalicəyə ehtiyacı olan ukraynalılara yardım məqsədi ilə Ukraynaya üçüncü səfərinə hazırlaşır. O, həmçinin Nyu Yorkdakı xəstəxanası ilə Lvivdəki Nezlamni Reabilitasiya Mərkəzi arasında birgə layihələr üçün pul toplayır.
