Accessibility links

Asiya və Avropada 1 May mitinqləri daha çox əmək hüquqları çağırışları ilə qeyd edilib


Mayın 1-də Asiya ölkələrinin paytaxtları və Avropa şəhərlərində fəhlələr və fəallar küçələrə çıxaraq qiymətlərin artımı və hökumətin əmək siyasətinə etiraz edərək, daha çox əmək hüquqlarına dair çağırışlarla çıxış edib.

1 May bir çox ölkədə işçilərin hüquqlarının müdafiəsi məqsədi ilə qeyd olunur. 1 May hadisələri həm də bir çoxlarına ümumi iqtisadi şikayətləri və ya siyasi tələbləri səsləndirmək imkanı verir.

İstanbul polisi hökumətin İşçi Bayramını əlamətdar yerdə qeyd etmək qadağasına məhəl qoymayaraq mərkəzi Taksim meydanına çatmağa çalışan onlarla insanı saxlayıb.

Prezident Rəcəb Tayyib Ərdoğan hökuməti uzun müddətdir ki, Taksimdə təhlükəsizlik səbəbi ilə mitinq və nümayişlərə qadağa elan edib, lakin bəzi siyasi partiyalar və həmkarlar ittifaqları üçün simvolik əhəmiyyətə malik meydana doğru yürüş etməyə söz verib.

1977-ci ildə naməlum silahlı şəxslər Taksimdə 1 May şənliyi zamanı izdihama atəş açaraq 34 nəfəri öldürmüşdülər. Çərşənbə günü polis barrikadalar qurub və mərkəzi İstanbul meydanına gedən bütün yolları bağlayıb. Ərazidə ictimai nəqliyyatın hərəkəti də məhdudlaşdırılıb.

1977-ci il hadisəsi qurbanlarının xatirəsinə ucaldılmış abidə önünə əklil qoymaq üçün yalnız kiçik bir qrup həmkarlar ittifaqı nümayəndələrinin meydana daxil olmasına icazə verilib. Çevik qüvvət polisi maneələri aşmağa çalışan solçu Xalq Azadlıq Partiyasının 30-a yaxın üzvünü saxlayıb.

İndoneziyada işçilər onların hüquqlarını pozduğunu və rifahlarına zərər verdiyini söylədiyi yeni qanuna qəzəblərini ifadə edərək, xaricdəki miqrant işçilərin müdafiəsini və minimum əmək haqqının artırılmasını tələb ediblər.

Onlar Cakartanın əsas idman stadionu Gelora Bung Karnoya yürüş zamanı işçi qrupların rəngarəng bayraqlarını dalğalandırıb və İş Yaratma Qanununa qarşı şüarlar səsləndirərək, Milli Abidə parkının yaxınlığında polisin sıx iştirakı ilə toplaşıblar.

İndoneziya parlamenti keçən il iş yerlərinin yaradılması ilə bağlı mübahisəli qanunu əvəz edən hökumət qaydalarını ratifikasiya edib, lakin tənqidçilər bunun hələ də bizneslərə fayda verdiyini deyir.

Qanun prezident Coko Vidodonun Cənub-Şərqi Asiyanın ən böyük iqtisadiyyatı olan ölkəyə daha çox investisiya cəlb etmək səylərinin bir hissəsi olaraq bürokratiyanı azaltmaq məqsədi daşıyır.

Cənubi Koreyanın paytaxtı Seulda minlərlə etirazçı mitinqinin başlanğıcında mahnı oxuyub, bayraqlar dalğalandırıb və əmək tərəfdarı şüarlar səsləndirib. Təşkilatçılar bildiriblər ki, onların mitinqi ilk növbədə, prezident Yoon Suk Yeolun rəhbərlik etdiyi mühafizəkar hökumətin apardığı əmək əleyhinə siyasətlərə tənqidi gücləndirmək məqsədi daşıyır.
Seul mitinqinin iştirakçıları daha sonra şəhərin mərkəzi küçələri ilə yürüş ediblər. Çərşənbə günü Cənubi Koreyanın 10-dan çox yerində analoji may mitinqləri keçirilib.

Polis asayişi qorumaq üçün minlərlə zabiti səfərbər edib, lakin zorakılıq barədə məlumat verilmədiyini bildirib.

Yaponiyada 10 000-dən çox insan Tokionun mərkəzindəki Yoyogi parkında 1 May tədbirinə toplaşaraq, maaş artımını tələb edib.

Mitinq zamanı sol təmayüllü Həmkarlar İttifaqları Milli Konfederasiyasının lideri Masako Obata bildirib ki, maaşların azalması Yaponiyada bir çox işçini ağır həyat şəraiti altına salıb və gəlir fərqlərini artırıb.

Filippinin paytaxtı Manilada yüzlərlə işçi və solçu fəal yayın qızmar istisində ərzaq və neft qiymətlərinin yüksəlməsi fonunda maaşların artırılması və iş təhlükəsizliyi tələbi ilə yürüş keçirib.

Forum

XS
SM
MD
LG