Keniya prezidenti Mvai Kibaki ölümlə nəticələnən zorakılıqlardan sonra seçkilər məsələsini müzakirə etmək üçün ilk dəfədir ki, müxalifət lideri Raila Odinga ilə görüşmüşdür. Görüşdə BMT-nin keçmiş baş katibi Kofi Annan da iştirak edib. Siyasi rəqiblərin görüşü bu gün cənab Kibakinin Nairobidəki ofisində, 4 saata yaxın davam edib.
Görüşdən sonra rəqiblər danışıqlar barədə heç bir məlumat vermədən müxbirlər qarşısında biri-birinin əlini sıxmışlar. Lakin cənab Odinqa Keniyada sülhün bərqərar olması üçün əlindən gələni edəcəyini, cənab Kibaki də öz növbəsində razılıq əldə ediləcəyinə əmin olduğunu deyib.