Əfqanıstan
rəsmiləri deyir ki, ölkənin cənubunda intiharçı hücumu nəticəsində 19-u mülki
vətəndaş və 5-i polis işçisi olmaqla, azı 24 nəfər həlak olub. Daxili işlər
nazirinin sözçüsü Zarami Bəşərinin sözlərinə görə, intiharçı Uruzqan vilayətinin
Deh Ravud məhəlləsində yerləşən bazardakı polis maşınını hədəf alıb. Bu gün baş
verən partlayış zamanı çoxu mülki vətəndaş olmaqla, ən azı 40 nəfər müxtəlif
dərəcəli xəsarət alıb. Hücumun məsuliyyətini hələlik öz üzərinə götürən
olmayıb. Ancaq rəsmilər intiharçı hücumuna görə Taliban yaraqlılarını
günahlandırır. Hadisə təxminən bir həftə əvvəl Əfqanıstan paytaxtı Kabildə
Hindistan səfirliyinin qarşısında partlayış zamanı 40-dan çox insanın həlak olmasından sonra baş verib.