Qarabağ münaqişəsinin həlli
ilə bağlı aparılan danışıqlar ərazi bütövlüyü və müqəddəratın təyini
prinsiplərini nəzərdə tutan kompromislərə əsaslanıb.
Bu barədə Amerika dövlət katibinin Avropa və Avrasiya
məsələləri üzrə yardımçısı Metyu Brayza avqustun 19-da Vaşinqtondakı Xarici Mətbuat
Mərkəzində çıxışı zamanı məlumat verib.
O deyib ki, ərazi bütövlüyü prinsipi birinci növbədə gəlir.
"Amma əgər hər iki tərəf beynəlxalq prinsiplərin başqa elementlərini də
əhatə edən kompromislərə getsələr, bu, əla olardı. Biz elə Qarabağda bunu etmək
istəyirik".
Cənab Brayza deyib ki, danışıqlar
nəticəsində elə bir həll tapılmalıdır ki, hər iki prinsipi nəzərdə tutsun.
Dövlət katibinin yardımçısı bir daha vurğulayıb ki, Kosovo ilə
Qafqazdakı münaqişələr arasında paralellər aparmaq əsassızdır.
Cənab Brayza deyib ki, Rusiya
Gürcüstandaki son hərəkətləri ilə özünün beynəlxalq icmadakı imicinə böyük zərbə vurdu. Və indi Moskvanın
atəşkəs razılığına əməl etmək, qoşunları geri çəkmək və münaqişə zonasına
çəkilməklə imicini düzəltmək imkanı var.
"Biz
Rusiya ilə əməkdaşlıq etmək istəyirik, amma Rusiya əməkdaşlığın qaydalarına,
özü də Amerika tərəfindən deyil, beynəlxalq ictimaiyyət tərəfindən
müəyyənləşdirilmiş qaydalarına riayət etməlidir", - deyib Metyu Brayza.
Onun
sözlərinə görə, Amerika Gürcüstanda azadlıq və sülhün tərəfdarı kimi bu məqsədi
sonadək həyata keçirməyə çalışacaq. Brayza Gürcüstana müdaxilə və onun
demokratik seçilmiş prezidentini devirmək cəhdini "axmaq qərar" adlandırıb.
Amerika
rəsmisi deyib ki, münaqişənin həlli üçün bu günlərdə NATO, ABŞ və Avropa
arasında gedən danışıqlar diplomatiyanın gücünün bir nümunəsi idi.
"Diplomatiya
öz işini gördü və bu ABŞ-Avropa Birliyi əməkdaşlığı sayəsində mümkün oldu.
Bizim siyasətimiz bu idi ki, insan haqları institutları, xarici jurnalistlər,
sivil cəmiyyət nümayəndələri arasında həmrəylik yaradaraq müdaxiləni geri
çevirə bilərik. Gürcüstanın liderləri prezident Buş və dövlət katibi Raysın və
əlbəttə ki, fransızların yardımı ilə danışıqlara başladılar, atəşkəs oldu", -
deyə dövlət katibinin yardımçısı qeyd edib.
Brayza
daha sonra vurğulayıb ki, bu, hələ son deyil, bundan sonra ziyanın bərpası,
hərbi və cinayətkar əməliyyatlar aparan və insanları qətlə yetirənlərin
mühakiməsi məsələsi durur.
Amerika rəsmisi bu arada Türkiyə hökumətinin
təşəbbüsü ilə Qafqaz İttifaqının yaradılması barədə aparılan müzakirələrdən təəccübünü
gizlətməyərək, bu barədə məlumatsız olduğunu vurğulayıb. Bunula belə, o.
Vaşinqtonla Ankara arasında Qafqaz mövzusunda sıx əməkdaşlığın davam etdiyini
bildirib.