Accessibility links

Zeyno Baran: “Qarabağ danışıqlarında yeni mərhələ başlaya bilər”


"Amerika və Avropa Qarabağ məsələsini Rusiyasız daha aktiv həll edə bilərlər". Bunu "Amerikanın səsi" radiosuna müsahibəsində Hadson Araşdırmalar Mərkəzinin Avrasiya proqramının direktoru Zeyno Baran bildirib. O deyib ki, bundan sonra Qarabağ danışıqlarında yeni mərhələ başlaya bilər: "Fərqli mərhələnin başlanacağını gözləyirik. Çünki Gürcüstandakı proseslər və Amerika ilə NATO-nun Rusiya ilə gərginləşən münasibətlərindən sonra Minsk prosesinin davam etməsi mümkün deyil".
Ekspert diqqəti ona yönəldib ki, Gürcüstandakı böhrandan sonra Qərbin dondurulmuş münaqişələrə yanaşmasında ərazi bütövlüyü prinsipi xüsusilə vacib götürülür.
"Kosovoda vəziyyət fərqli idi. Ancaq Rusiyanın Gürcüstandakı davranışlarından sonra Qərb indi ərazi bütövlüyü məsələsində daha konkret şəkildə Azərbaycanın yanında olacaq", - deyə ekspert vurğulayıb.
Zeyno Baranın fikrincə, erməni diasporu və daxili siyasət Amerika üçün indi Qafqazı qorumaq və enerji təhlükəsizliyini təmin etmək ehtiyaclarından vacib deyil.
"Odur ki, real siyasət hazırda Vaşinqtonda Ermənistanla müqayisədə Azərbaycanın əhəmiyyətini artıracaq", - deyib Zeyno Baran.
Politoloq habelə bildirib ki, Qərb Rusiyanın qarşısında aciz deyil.
Tezliklə Qafqazda Şərq-Qərb enerji dəhlizinin və neft kəmərlərinin təhlükəsizliyini artıracaq tədbirlər görülməlidir. Bunun üçün Tbilisiyə maddi və hərbi yardımlar ediləcək.
"Daha əvvəl NATO-nun BTC-nin təhlükəsizliyində iştirakını senator Luqar gündəmə gətirmişdi": - deyə Zeyno Baran xatırladıb.
ABŞ-ın vitse-prezidenti Dik Çeyninin gələn həftə regiona planlaşdırılan səfərinə toxunan ekspret bildirib ki, məqsəd enerji dəhlizinin təhlükəsizliyini və bölgədəki vəziyyəti nəzərdən keçirməkdir. Onun fikrincə, yüksəkrütbəli Amerika rəsmisi Bakıda və Tbilisidə Qərbin bu ölkələrin yanında olduğu mesajını verəcək.

XS
SM
MD
LG