Rusiya xarici işlər naziri Sergey Lavrov Türkiyənin "Qafqaz evi"
yaratmaq ideyasını dəstəkləyib. "Amerikanın səsi"nin Türkiyə Bürosunun
məlumatına görə, cənab Lavrov bunu sentyabrın 2-də, İstanbulda türkiyəli
həmkarı Əli Babacanla görüşdən sonra bildirib.
Rusiya xarici işlər nazirinin səfəri
Azərbaycan və Gürcüstanın XİN rəhbərlərinin ötən həftə Türkiyəyə işgüzar
ziyarətlərindən sonraya təsadüf edir.
Türkiyənini xarici işlər naziri Əli
Babacan ölkəsinin Abxaziya və Cənubi Osetiyanın müstəqilliyi məsələsində Rusiya
ilə fikir ayrılığı yaşadığına işarə edərək, bunun ikitərəfli münasibətlərə
təsir göstərmədiyini vurğulayıb. Öz növbəsində Lavrov bildirib ki, Türkiyənin
NATO üzvü olması və Gürcüstan məsələsinə yanaşması qarşılıqlı münasibətlərə
zərər vura bilməz. Bununla yanaşı, Rusiyanın xarici işlər naziri NATO
ölkələrinin Gürcüstanı silahlandırmasından narazılığını bildirib, habelə
Rusiyanın İrana S-300 silahları satması barədə məlumatları təkzib edib.
İki
nazir həmçinin son günlərdə Rusiya ilə Türkiyə arasında gömrük sahəsində
yaranmış problemi də müzakirə ediblər. Belə ki, Moskva Ankaranın Gürcüstana
gedən Amerika hərbi gəmilərinə keçid üçün icazə verməsindən sonra Türkiyə ilə
sərhəddə gömrük yoxlamalarını sərtləşdirmişdi. Ankada da cavab olaraq sərhəddə
Rusiya yük maşınlarının keçid qaydalarını sərtləşdirmişdi. Babacanla danışıqdan
sonra Lavrov problemin həlli üçün Rusiyanın baş naziri Vladimir Putinlə
görüşəcəyini vəd edib. Nazirlər görüşdə ölkələrarası ticarət dövriyyəsinin
həcminin illik 20 milyard dollardan 25 milyard dollara çatdırılmasının
vacibliyini vurğulayıblar.