İraq
televiziyasının bildirdiyinə görə, silahlılar ölkənin şimalında telekanalın 4
əməkdaşını oğurlayaraq öldürüb. Ərazidəki mənbələr deyir ki, 4 nəfər reportaj
hazırlamağa gedərkən bu gün Mosul şəhərində qətlə yetirilib. Qətlin
məsuliyyətini heç kəs öz üzərinə götürməyib. Baş qərargahı Nyu-Yorkda yerləşən
Jurnalistləri Müdafiə Komitəsinin dediyinə görə, İraq bütün dünyada
jurnalistlərin ən çox həlak olduğu yerdir. Qrupun məlumatında deyilir ki,
2003-cü ildən bəri İraqda 130 reportyor və 50-ə yaxın mətbuata dəstək verən
şəxs qətlə yetirilib. Bununla yanaşı, İraq rəsmilərinin sözlərinə görə, bu gün
baş verən iki bomba hücumu nəticəsində təhlükəsizlik qüvvəsinin 10 üzvü həlak
olub.