Accessibility links

Kondoliza Rays: “Qarabağ məsələsinin həlli üzərində işləyirik”


"Amerika Rusiyanın suveren ölkələrə və azad xalqlara qarşı təzyiqlərini cavabsız qoymayacaq". Bunu Birləşmiş Ştatların dövlət katibi Kondoliza Rays Vaşınqtondakı Transatlantik Siyasət Mərkəzində - Marşall Fondunda çıxışı zamanı bəyan edib.
Dövlət katibi deyib ki, Amerika və Avropa Rusiyanın suveren ölkələrə və azad xalqlara qarşı təzyiq cəhdlərinin qarşısını alacaq:
"Birləşmiş Ştatlar və Avropa birmənalı olaraq Rusiyaya qonşu ölkələrin ərazi bütövlüyünü və müstəqilliyini dəstəkləməkdə davam edir. Biz Rusiyanın suveren millətləri və azad xalqları təsir zonasına qaytarmaq cəhdlərinə müqavimət göstərəcəyik.
Biz regionun daha bir münaqişəsini - Dağlıq Qarabağ məsələsini həll etmək və dost ölkələr, Türkiyə kimi müttəfiqlərimizlə Qafqazda əməkdaşlıq fondu yaratmaq üzərində işləyirik».
Dövlət Katibi Rays deyib ki, Rusiya avqustun 7-də Gürcüstan ərazisinə müdaxilə etməklə çox uzağa gedib və özünü ifşa edib. Belə ki, bu, Rusiya rəhbərlərinin apardıqları siyasətin mahiyyətini açıb və Qərblə Rusiyanın münasibətlərini kritik həddə çatdırıb:
"Biz Rusiyaya ümumi problemlərimizi həll etmək üçün böyük güc kimi hörmət edirdik. Amma Rusiya liderləri sadəcə olaraq dəyişilmədilər. Onların son hərəkətləri sual yaradır ki, biz indi Soyuq müharibə ilə məşguluq? Yox, biz yox".
Amerika dövlət katibi hesab edir ki, Qərblə Rusiya arasında bu cür münasibət rus xalqının da marağına ziddir, çünki ölkə iqtisadiyyatına da zərbə edirmiş olur. İndi Rusiya liderlərinin öz xalqları üzərinə ağır iqtisadi yük qoyduğunu söyləyən dövlət katibi Rusiyanın Dünya Ticarət Təşkilatına üzvlüyə qəbulunun ciddi sual altında qaldığını söyləyib. Onun fikrincə, eyni sözləri İqtisadi Əməkdaşlıq və İnkişaf Təşkilatına da aid etmək olar. Rays birmənalı şəkildə diqqətə çatdırıb ki, Moskvanın Gürcüstan müharibəsindəki əsas məqsədinə - orda hökuməti devirmək məqsədinə nail olmasına heç vaxt imkan verilməyəcək. Onun sözlərinə görə, Gürcüstanın müdafiəsi məsələsində Avropa və Amerika tamamilə yekdildirlər.
Qafqazda enerji məsələsinə də toxunan dövlət katibi qeyd edib ki, Qərb Rusiyanın qaydaları ilə hərəkət etmək niyyətilə deyil: «Birləşmiş Ştatlar və Avropa böyük enerji müstəqilliyinə nail olmaq üçün Azərbaycan, Gürcüstan, Türkiyə və Xəzər ölkələri ilə əməkdaşlığı gücləndirir. Biz iqtisadiyyatda açıq qlobal enerjini genişləndirəcək və ziyanlı təcrübədən müdafiə edəcəyik. Hər şey tək Rusiya və ya bir başqasının qoyduğu qaydalara uyğun ola bilməz». Rusiyanın gələcəyinin öz əlində olduğunu deyən K.Rays vurğulayıb ki, Gürcüstanla münaqişədən sonra Kremlin beynəlxalq aləmdəki mövqeyi 1991-ci ildəkindən də zəifləyib. Dövlət katibi Rusiyada avtoritar tendensiyaların gücləndiyini, xarici təcavüzkarlığın isə artdığını vurğulayıb və buna təəssüfləndiyini bildirib.

XS
SM
MD
LG