Azərbaycan,
Ermənistan və Türkiyə xarici işlər nazirlərinin görüşü Nyu-york vaxtı ilə
günorta saat 1 radələrində yekunlaşıb. Görüş BMT Baş Assambleyası
yaxınlığındakı “Millenium” otelində keçirilib və danışıqlar təxminən bir saat
davam edib. Bundan əvvəl isə Türkiyə və Ermənistanın xarici işlər nazirləri Əli
Babacan və Edvard Nalbandyan təkbətək görüş keçirib. Sonra isə Elmar
Məmmədyarov da digər iki həmkarına qatılıb. Görüşdən sonra nazirlər qısa
açıqlama verərək bildiriblər ki, onlar bu formatda dialoqların davam
etdirilməsində maraqlıdırlar. Türkiyənin xarici işlər naziri Əli Babacan
növbəti görüşlərin olacağını bildirib. Buna baxmayaraq danışıqların mahiyyəti
və müzakirə edilən dəqiq təkliflər haqqında heç bir məlumat verilməyib. Ancaq
Ermənistanın xarici işlər naziri bildirib ki, həm Azərbaycan-Ermənistan
münaqişəsi, həm də Ermənistan-Türkiyə münasibətlərinin birgə müzakirə
olunmasında maraqlıdırlar və bu istiqamətdə də danaşıqlar aparılıb. Onun
sözlərinə görə, yaxın bir neçə gün ərzində dəyişikliklər baş verə bilər. Ancaq
nazir konkret nədən söhbət getdiyini bildirməyib. “Bu formatda dialoqlar
münaqişənin həlli istiqamətində daha ətraflı imkanlar verir”-deyə o
bildirib. Azərbaycanın xarici işlər naziri Elmar Məmmədyarov da nikbin olduğunu və növbəti görüşlərdən sonra
bu formatda danışıqlarının əhəmiyyətinin olub-olamaması barədə dəqiq söz
deməyin mümkün olacağını dilə gətirib.
Görüşdən öncə Minsk qrupunun həmsədrləri də danışıqların keçiriləci ünvanda olsalar da, dialoqlara qatılmayıblar. ABŞ-dan olan həmsədr “Amerikanın səsi”nə bildirib ki, görüşün baş tutması həmsədrləri sevindirir, ancaq bugünkü görüşdə onların birbaşa iştirak gözlənilmir. “Əvvəldən Azərbaycan və Ermənistan nazirlərinin görüşdürmək mümkünlüyü haqqında müzakirələr aparmışıq və şadıq ki, belə bir görüş baş tutub”-deyə amerikalı həmsədr bildirib.