ABŞ
reydləri zamanı İraqda 5 yaraqlı, 3 qadın və 3 uşaq həlak olub. Ordu deyir ki,
əsgərlər bu gün Mosulda terrorçuların gizləndiyini ehtimal etdikləri evə daxil
olaraq atəş açıblar. Sonra isə yaraqlı intiharçı gödəkçəsini işə salıb. Bu gün
açıqladığı bəyanatda ordu bildirir ki, reyd zamanı 5 terrorçu öldürülüb. Bir
uşaq isə yaralanıb. Reyd zamanı əsgərlər habelə, binadan silah-sursat və
partlayıcı maddələr aşkar edib. Bu arada, dünən 2 Amerika vertolyotu İraq paytaxtı
Bağdaddakı bazaya enən zaman toqquşub. Qəza zamanı bir İraq əsgəri həlak olub. Yaralananlar
arasında isə 2 İraq və 3 ABŞ əsgəri var. Qəzanın hansı səbəbdən baş verdiyi
bəlli deyil, ancaq bunun terror aktı olduğu istisna edilir. İraq polisi deyir ki,
qəza zamanı İraq qüvvələri ilə silahlılar arasında toqquşma baş verib. ABŞ ordusu bu iddianı təkzib edib.