Zimbabvenin
ana müxalifət lideri Morqan Çanqiray ölkədə siyasi böhranı həll etmək üçün
keçirilən Cənubi Afrika liderləri sammitini boykot edir. Müxalif Demokratik
Dəyişiklik Hərəkatının rəsmiləri deyir ki, Çanqiray sammitdə iştirak məqsədilə
Svazilendə getmək üçün sənədlərinin hazırlanmasının gecikdirilməsinə etiraz
edir. Partiyanın bildirdiyinə görə, hakim Zanu-PF partiyası Demokratik
Dəyişiklik Hərəkatı ilə hakimiyyəti bölüşdürməyə maraqlı deyil. Sammit bu gün
Zimbabve dövlət başçısı Robert Muqabe ilə yanaşı, Svazilend, Cənubi Afrika,
Mozambik və Konqo Demokratik Respublikasının prezidentlərinin iştirakı ilə öz
işinə başlayıb. Habelə toplantıya qatılan Zimbabvenin kiçik müxalifət
fraksiyasının lideri Artur Mutambara sammitdə cənab Çanqiray olmadan hər hansı
razılaşmanın əldə edilməsinə mane olacağını bildirib.