ABŞ prezidenti Barak Obama Amerikanın tərəfdaşlıq və ticarət sahələrində İranla əlaqələrə yeni başlanğıc verilməsini istədiyini deyib. Novruz bayramı münasibəti ilə video müraciətində prezident İran liderlərinə üz tutaraq, ciddi fikir ayrılıqlarına baxmayaraq, administrasiyanın İran və beynəlxalq ictimaiyyətlə diplomatiya və konstruktiv əlaqələr yaradılması səylərini davam etdirmək əzmində olduğunu bildirib. Prezident İranla ABŞ arasında son 30 ildə gərginliklərin mövcudluğunu xatırladaraq indi yeni eraya başlanğıc verilməli olduğunu bildirib.
Barak Obama deyib ki, münasibətlər
təhdidlər deyil, səmimiyyət və qarşılıqlı ehtirama əsaslanmalıdır. ABŞ
dövlət başçısı bildirib ki, İranın ölkələr arasındakı yeri terror və ya
silah deyil, sülhpərvər əməllərlə müəyyən edilməlidir. ABŞ prezidenti
İranın belə bir yer tutmağa haqqı olduğunu, lakin bunun məsuliyyət
tələb etdiyini deyib.
Novruz bayramı münasibətilə video müraciətində
Barak Obama İranlıların da yeni il Bayramı kimi qeyd etdikləri
Novruzun yeni vədlər gətirəcəyini deyib. Prezident bu vədlərin
uşaqlar, ailələr və icmalara imkanlar yaradacağını dövlətlərarası sülhə
yol açacağını bildirib. ABŞ dövlət başcısı təbrikini fars dilində
Eydi Şoma, yəni bayramınız mübarək sözləri ilə bitirib.
Barak
Obamanın dedikləri onun sələfi Corc Buşun İranın təciridi səyləri və bu
ölkəni "şər mehvəri" adlandırdığı siyasətin tamamilə əksidir. Prezident Obama
çıxışında diqqəti gələcəyə yönəldib.
ABŞ prezidenti keçmişdə
İranla diplomatik təmaslar ehtimalından bir neçə dəfə bəhs etmişdi.
Buna baxmayaraq dövlət katibi Hilları Klinton bu yaxınlarda İranla
bağlı kəskin bəyanatlar vermişdi. ABŞ dövlət katibi İranı ərəb
dünyasında parçalanmanı həvəsləndirmək, terrorizmi dəsdəkləmək və başqa
ölkələri qorxutmağa çalışmaqda ittiham etmişdi. Xanım Klinton daha
sonra demişdi ki, Obama administrasiyası yanlız İranla danışıqların
nəticə verəcəyinə əmin olduğu təqdirdə bu ölkələylə müzakirələr
keçirmək istəyir.