Yerli mənbələrin bildirdiyinə görə, Təbrizli tar müəllimi Həsən Dəmirçinin
özəl musiqi məktəbi Eteelaat əməkdaşları tərəfindən qapadılıb. Musiqi
məktəbinin bağlanması üçün əsaslı səbəbin göstərilmədiyi bildirilir. Tanınmış
ziyalı Həsən Dəmirçinin rəhbərlik etdiyi “Azərbaycan Musiqi Məktəbi”nin
fəaliyyəti Təbrizin Mədəniyyət İdarəsinin qeydiyyatından keçib və həmin orqan
tərəfindən lisenziyalaşdırılmışdı. Buna baxmayaraq naməlum səbəblərə görə,
məktəbin lisenziyasına xitam verilib və qapıları möhürlənib.
Bundan öncə, cənab Dəmirçinin iş yerinin bir neçə dəfə Ettelaat
əməkdaşları tərəfindən axtarıldığı, musiqi ustasının arxivində saxladığı çox
sayda musiqi kasetlərin müsadirə olunduğu barədə xəbərlər yayılmışdı.
Azərbaycanlı fəal Həsən
Dəmirçi 2006-ci ildə Azərbaycan şəhərlərində baş vermiş etirazlar zamanı həbs
olunmuş və 6 ay müddətinə həbsdə saxlanmışdı. Azadlığa buraxıldıqdan sonra onun
davamlı təzyiqlərə məruz qaldığı bildirilir.