Tehranda həbsdə olan İranlı Amerikalı
jurnalistin atasının bildirdiyinə görə, aclıq aksiyasını davam etdirən qızının
səhhəti pisləşib. Casusluq ittihamı ilə 8 illik azadlıqdan məhrum edilən
Roksana Saberi keçən həftənin çərşənbə axşamından həbsinə etiraz əlaməti olaraq
aclıq aksiyasına başlayıb. Atası bu gün onu fikrindən daşındırmağa çalışsa da,
xanım Saberi deyib ki, azadlığa çıxana kimi aksiyanı davam etdirəcək. Bununla
yanaşı, bu gün dövlət telekanalının Xarici İşlər Nazirliyinin mətbuat katibi
Həsən Qaşqaviyə istinadən verdiyi məlumata görə, məsələ ilə bağlı hər hansı
xarici müdaxilə qəbuledilməzdir. Rəsmi nümayəndə deyir ki, Saberi İrandan başqa
ayrı bir dövlətin vətəndaşı olmasını iddia etməyib və ona görə də onun işi
daxili məsələdir.