İran
dövlət mətbuatının məlumatına görə, mübahisəli prezident seçkilərində verilmiş
səslərin bir hissəsinin yenidən hesablanması davam edir. İranda seçkilərə
nəzarət edən Nəzarət Şurası bu gün ölkə üzrə bülletənlərin 10 faizini yenidən
yoxlamağa başlayıb. Mübahisəli 12 iyun seçkiləri rəsmi nəticələrə görə
prezident Mahmud Əhmədinejadın qələbəsi ilə başa çatmışdı. Bu gün şura üzvləri
məğlub namizəd Mir Hüseyn Musəvi ilə görüşüb. İran dövlət mətbuatı bildirir ki,
şuranın sözçüsü görüşü nəticəsiz adlandırıb. Cənab Musəvi səslərin bir
hissəsinin yenidən hesablanmasını rədd edərək, seçki nəticələrinin ləğvinə
təkid edib. Başqa bir məlumata görə, İran Böyük Britaniyanın Tehrandakı
səfirliyinin 5 əməkdaşını sərbəst buraxıb. Onlar bir neçə gün öncə seçkisonrası
iğtişaşlarla bağlı həbs edilmişdilər. İranın Xarici İşlər Nazirliyinin sözçüsü
Həsən Qaşqavi bui gün mətbuat konfransında bildirib ki, nəzarət altına alınan 9
nəfərdən 5-i buraxılıb, digərləri isə sorğu-sual olunur.