Ukrayna prokurorları 2000-ci ildə
jurnalisti Georgi Qonqadzeni oğurlayaraq, qətlə yetirməkdə və sonradan işlə
əlaqədar sənədləri sıradan çıxarmaqda günahkar bilinən keçmiş polis rəisi Oleksi
Pukaça qarşı formal olaraq ittiham irəli sürüblər. Rəsmilər Pukaçı çərşənbə
axşamı günü həbs ediblər və onun bütün bu ittihamları etiraf etdiyini bildiriblər.
Xatırladaq ki, hələ Ukraynada Leonid Kuçmanın prezidentliyi dövrü hökumətdə korrupsiya barədə özünün internet səhifəsində yazılar yerləşdirən Georgi Qonqadze 2000-ci ilin sentyabr ayında oğurlanmış və onun cəsədi iki aydan sonra Kiyev yaxınlığında aşkar edilmişdi. O zaman Pukaç Ukraynanın Daxili İşlər Nazirliyində Nəzarət şöbəsinə rəhbərlik edirdi.