Bu gün Bilik günündə ABŞ-ın Azərbaycandakı səfiri Enn Dersi Bakının Binə
qəsəbəsində Laçınlı məcburi köçkünlərin icmasından olan şagirdlər üçün yeni
tikilmiş məktəbin açılış mərasimində olub. Məktəb ABŞ Müdafiə Nazirliyinin
Avropa Komandanlığının maliyyə dəstəyi ilə tikilib. Tikintiyə və məktəbin
təchizat işlərinə 386,422 dollar xərclənib.
ABŞ-ın Azərbaycandakı səfiri Enn Dersi bildirib ki, bu
məktəb ABŞ və Azərbaycan xalqının güclü dostluğunun gələcəyə töhvə verməsinin
konkret sübutudur. “Sentyabrın əvvəlində Azərbaycana səfər etmiş ABŞ vitse-prezidenti
Dik Çeyni qeyd edib ki, ABŞ-ın Azərbaycanın sabitliyi və proqresində dərin və
davamlı marağı var. Biz Sizin dostunuzuq. Yalnız bu həftəlik və ya bu illik
deyil, iyirmi birinci əsrdə birgə inkişaf etdiyimiz illər və onilliklər ərzində
dostunuz olacağıq”.
O, D.Çeyninin Dağlıq Qarabağ münaqişəsindən əziyyət
çəkən icma qarşısında ABŞ-ın Azərbaycanın ərazi bütövlüyü və suverenliyini
dəstəkəməsi ilə bağlı bəyanatını bir daha təkrarlayıb. “Amerika Azərbaycanın suverenliyini
və ərazi bütövlüyünü dəstəkləyir. Biz Dağlıq Qarabağ münaqişəsinin danışıqlar
yolu ilə həllinə nail olunmasına, ərazi bütövlüyü prinsipi ilə başlanan və
digər beynəlxalq prinsipləri nəzərə alan çıxış yolunun tapılmasına sadiqik. Münaqişənin
həlli bu gün həmişəkindən daha vacibdir; bu nəticə bölgədə sülh və sabitliyi,
eləcə də Azərbaycanın təhlükəsizliyini gücləndirəcək”.
ABŞ Müdafiə Nazirliyinin Avropa Komandanlığının Maddi
Texniki Təchizat və Təhlükəsizlik üzrə Yardım Departamentinin rəis müavini
Robert Mur bildirib ki, ABŞ Azərbaycanla Təhlükəsizlik sahəsində əməkdaşlığını bundan
sonra da davam etdirəcək. Onun sözlərinə görə, Avropa Komandanlığı Azərbaycanda
məktəb tikinitisini davam etdirəcək.
Azərbaycan Baş nazirinin müavini, Dövlət qaçqınkomun
sədri Əli Həsənov ABŞ-ın daim Azərbaycana yardım etdiyini deyib. Onun sözlərinə
görə, ABŞ başqa dövlətlərdən fərqli olaraq, indi də məcburi köçkünlərə
yardımını dayandırmayıb. “Artıq bir sıra dövlətlər və beynəlxalq təşkilatlar Azərbaycanın
iqtisadi inkişafını əsas gətirərək məcburi köçkünlərə yardımlarını dayandırıb. ABŞ
isə yardımlarını davam etdirir və sadəcə yardım proqramlarının istiqamətini
dəyişib. Bu baxımdan Amerika bir sıra dövlətlər, xüsusilə də Avropa dövlətləri
üçün örnək ola bilər”. Xatırladaq ki, ABŞ indiyədək Azərbaycanda məcburi
köçkünlər üçün on dörd məktəb tikib.
Baş nazirin müavini “Amerikanın səsi” radiosunun sualının cavabında isə Azərbaycan məcburi köçkünlərinin doğa yurdlarına qayıdışını nəzərdə tutan "Böyük qayıdış" proqramının hazırlandığını bildirib. İlkin hesablamalara görə, proqramın həyata keçirilməsi üçün azı 62 milyard dolar vəsait tələb olunur. Ancaq proqramın reallaşdırılması Ermənistan-Azərbaycan münaqişəsi nizamlandıqdan sonra mümkündür.