Accessibility links

Moskva bəyanatı Bakıda ciddi reaksiya doğurmur  


Azərbaycan, Ermənistan və Rusiya prezidentləri dünən Moskva görüşündən sonra birgə bəyanatla çıxış edib. Sənəddə deyilir ki, Azərbaycan, Ermənistan və Rusiya prezidentləri Rusiya prezidentinin dəvəti ilə görüşərək, konstruktivlik şəraitində Dağlıq Qarabağ münaqişəsinin vəziyyəti və siyasi vasitələrlə Rusiya, ABŞ və Fransanın ATƏT-in Minsk qrupu həmsədrləri qismində iştirakı ilə Azərbaycan və Ermənistan arasında birbaşa dialoqun davam etdirilməsi yolu ilə münaqişənin həlli perspektivlərini konkret və ətraflı müzakirə edib.
Dövlət başçıları bildirir ki, Cənubi Qafqazda vəziyyətin sağlamlaşdırılması və Dağlıq Qarabağ münaqişəsinin beynəlxalq hüquq prinsip və normaları, və bu çərçivədə qəbul edilmiş sənədlər əsasında siyasi həlli yolu ilə regionda sabitlik və təhlükəsizlik şəraiti qurulmasının təmin edilməsinə yardım edəcəklər. “Bu da regionda iqtisadi inkişaf və hərtərəfli əməkdaşlıq üçün əlverişli şərait yaradacaq. ATƏT-in Minsk qrupu həmsədrlərinin 29 noyabr 2007-ci il Madriddə tərəflərlə görüşünü və təməl siyasi həll prinsiplərin işlənməsi məqsədilə sonrakı müzakirələri nəzərə almaqla, həmsədrlərin vasitəçilik səylərinin davam etdirilməsinin böyük əhəmiyyətini qeyd edir”.

Prezidentlər razılaşıblar ki, sülh yolu ilə həllə nail olunması bütün aspekt və mərhələlərə hüquqi öhdəlik yaradan beynəlxalq zəmanətlərlə müşaiyyət olunmalıdır. “Dövlət başçıları qeyd edir ki, Azərbaycan və Ermənistan prezidentləri Qarabağ münaqişəsinin siyasi yolla həllinin razılaşdırılması üzərində işi, o cümlədən yüksək səviyyəli əlaqələri davam etdirmək barədə razılığa gələrək, xarici işlər nazirlərinə danışıqlar prosesində ATƏT-in Minsk qrupu həmsədrləri ilə birgə gələcək addımları fəallaşdırmağı tapşırıb. Nizamlanma üzrə səylər kontekstində etimadın möhkəmlənməsi üzrə tədbirlər həyata keçirilməsi üçün şərait yaradılmasının təşviqini vacib sayır”.

Azərbaycanda prezidentlərin birgə bəyanatına münasibət birmənalı deyil. Rəsmi Bakı sənədi mühüm adlandırsa da, müxalifətdə olan siyasi partiyalar və müstəqil politoloqlar Moskvanın “siyasi görüntüsü” kimi qiymətləndirir.

Xarici İşlər nazirliyinin mətbuat xidmətinin rəhbəri Xəzər İbrahim sənədi vacib sayır. O “Amerikanın səsi” radiosuna bildirib ki, Azərbaycan və Ermənistan prezidentləri ilk dəfədir belə bir sənədi imzalayır.

Şərq-Qərb Araşdırmalar Mərkəzinin rəhbəri Ərəstun Oruclu bildirir ki, tərəflərin münaqişəni sülh yolu ilə həll etmək niyyətinin əks olunması yenilik deyil. Bu əslində Rusiya üçün bir piar siyasətidir. “Xüsusən, Azərbaycan və Ermənistan Avropa Şurasına daxil olarkən, Avropa İttifaqı ilə əməkdaşlıq çərçivəsində Fəaliyyət Planını imzalayarkən, Avropa qonşuluq siyasəti çərçivəsində münaqişəni sülh yolu ilə həll etmək öhdəliyi götürüb”.
Müxalifətdə olan AXCP sədri Əli Kərimli də sənədin hər hansı hüquqi əhəmiyyətinin olmadığını deyir. Onun fikrincə, bu Rusiyanın Gürcüstanın işğalından sonra guya regionda sülhə tərəfdar olması görüntüsü yaratmaq cəhdidir. Cənab Kərimli eyni zamanda hesab edir ki, sənədlə Gürcüstan böhranından sonra ilk dəfə olaraq ATƏT-in Minsk Qrupu həmsədrləri formatı bir daha təsdiq edilib.

XS
SM
MD
LG