Təbriz həbsxana səlahiyyətliləri türk fəal Əli Əhmədinin şərti azadlığa çıxmasına icazə verməyib.
Bu haqda Güney Azərbaycan Televiziyası (Günaz TV) məlumat yayıb.
İran Azərbaycanının Parsabad (Muğan) şəhərinin sakini olan siyasi məhbus Əli Əhmədi iyulun 13-də 7 aylıq həbs cəzasının tətbiq edilməsi üzrə Təbriz Mərkəzi Həbsxanasına köçürülmüşdü.
Təbriz Həbsxana Şurası türk fəalın məzuniyyət tələbinə, eləcə də şərti olaraq sərbəst buraxılmasına qarşı çıxıb.
Əli Əhmədi, Cəfər Rüstəmi-Rad, Əli Sərraf, Əli Səadəti, Əsgər İbadzadə, Kəsri Davudi və Siyamək Seyfi ilə birlikdə 2013-cü ilin fevral ayının 26-da Asiya Çempionlar Liqası oyunları çərçivəsində Təbrizdə keçirilən Traktor-Əl-Cəzirə matçından sonra təhlükəsizlik qüvvələri tərəfindən nəzarət altına alınmışdı.
Məhkəmə əvvəlcə stadionun nizamını pozmaq ittihamı ilə 3 ay həbs və 30 qamçı cəzasına məhkum etmişdi. Daha sonra Təbriz İnqilab Məhkəməsi Əhmədiyə qarşı sistemə qarşı təbliğat aparmaq ittihamı irəli sürərək, 7 ay müddətinə həbs cəzasına məhkum etmişdi.
