Dekabrın 19-da ATƏT-in Minsk qrupunun həmsədrlərinin təşəbbüsü ilə İsveçrənin Bern şəhərində Azərbaycan prezidenti İlham Əliyevlə Ermənistan prezidenti Serj Sarkisyanıngörüşü olub.
Azərbaycan prezidentinin rəsmi saytının məlumatına görə, görüşdə ATƏT-in Minsk qrupunun həmsədrləri və ATƏT-in fəaliyyətdə olan sədrinin xüsusi nümayəndəsi iştirak edib.
Görüşün detalları ilə bağlı məlumat verilmir.
Görüşün yekunları ilə bağlı ATƏT-in Minsk Qrupu həmsədrlərinin yaydığı birgə bəyanatda deyilir ki, Azərbaycan prezidenti İlham Əliyevlə Ermənistan prezidenti Serj Sərkisyanın təkbətək görüşü onların mövqelərinin dəqiqləşdirilməsinə imkan verib.
Sənəddə deyilir ki, görüş zamanı prezidentlər bu yaxınlarda təmas xəttindəki gərginliyin artmasından, ağır hərbi texnikadan istifadə nəticəsində mülki şəxslərin ölümündən narahat olduqlarını xüsusi olaraq qeyd ediblər.
"Prezidentlər həmsədrləin təmas xəttində və Azərbaycan-Ermənistan sərhədində gərginliyin azaldılması ilə bağlı cari təkliflərini, o cümlədən araşdırmanın aparılması mexanizmini dəstəkləyiblər. Prezidentlər qarşılıqlı fəaliyyət göstərməyin davam etdirlməsini təsdqiləyərək, Minsk Qrupu formatına sadiq olduqlarını bildiriblər" .
Həmsədrlər həmçinin Dağlıq Qarabağ münaqişəsinin sülh yolu ilə nizamlanmasında vasitəçiliklərini davam etdirəcəklərini bildirir.
