Accessibility links

Co Bayden belaruslu blogerin həbsini "beynəlxalq normalara qarşı çıxmaq” kimi qiymətləndirib


ABŞ Prezidenti Co Bayden Belarusda təyyarənin endirilməsi və Protaseviçin həbsi ilə bağlı açıqlama verib. O, bunu “həm siyasi müxalifətə, həm də mətbuat azadlığına biabırçı hücum” və “birbaşa beynəlxalq normalara qarşı çıxmaq” kimi qiymətləndirib.

Avropa İttifaqı Belarusun sərnişin təyyarəsini bazar günü Minskə təcili eniş etməyə məcbur etməsindən və avtoritar prezident Aleksandr Lukaşenkonu tənqid edən müxalif blogeri həbs etməsindən sonra quruma üzv ölkələr hava məkanlarını və hava limanlarını bütün Belarus hava yolları şirkətlərinə bağlamağa çağırır.

Afinadan qalxan və Litvanın paytaxtı Vilnüsdə enməsi planlaşdırılan Ryanair FR4978 təyyarəsi bomba təhdidi səbəbi ilə Belarus hava məkanına yönləndirilmişdi.

Minsk hökuməti Lukaşenkonun orduya təyyarəni Minsk hava limanına endirmək üçün MiG-29 qırıcı təyyarəsini havaya qaldırmağı əmr etdiyini bildirib.

Aİ və ABŞ Lukaşenko hökumətini Polşada mühacirətdə yaşayan 26 yaşlı bloger Roman Protaseviçi dərhal sərbəst buraxmağa çağırıb.

Nüfuzlu Telegram kanalları Nexta və Nexta Live-ın keçmiş redaktoru Protaseviç Belarus rəsmiləri təyyarədə axtarış apararkən polis tərəfindən saxlanılıb.

Bazar ertəsi Belarus dövlət televiziyasında yayımlanan bir videoda Protaseviçin vətəndaş iğtişaşlarında məsuliyyət ittihamını “etiraf etdiyi” göstərilib.

“Salam, mənim adım Roman Protaseviçdir. Dünən məni Minsk Milli Hava Limanında saxlayıblar. İndi 1 saylı Minsk həbsxanasındayam. Ürək və ya başqa bir orqan xəstəliyi daxil olmaqla, heç bir sağlamlıq problemim olmadığını deyə bilərəm. Polis məmurları mənimlə qanuna uyğun və düzgün davranırlar. Bundan əlavə, indi istintaqla əməkdaşlığa davam edirəm və Minskdə kütləvi etirazların təşkili barədə etiraflar edirəm" - deyə, o bildirib.

Minsk hökuməti Nexta kanallarının seçki saxtakarlığı ilə əlaqədar keçənilki Lukaşenko əleyhinə etirazlarını təşkil etmək üçün əsas yollardan biri olduqdan sonra Protaseviçi terrorizmdə və iğtişaşlar törətməkdə günahlandırmışdı.

Ryanair şirkəti hadisəni “aviasiya quldurluğu aktı” adlandırıb və Avropa İttifaqı və NATO-nun təhlükəsizlik qurumları ilə araşdırmalarda əməkdaşlıq etdiyini bildirib.

Air France, Lufthansa və Singapore Airlines daxil olmaqla, bir neçə aviaşirkət Belarus hava məkanından uçmayacaqlarını açıqlayıb.

Şərhlərə bax

XS
SM
MD
LG