13 saylı Cəzaçəkmə Müəssisəsində saxlanılan gənc fəal Bayram Məmmədov İyulun 2-də ailəsi ilə görüşüb.
Bu barədə məhbusun atası Fərman Məmmədov AzadlıqRadiosuna bildirib.
Fərman Məmmədov oğlunun vəziyyətinin yaxşı olduğunu, səhhətində ciddi problem yaşanmadığını dedi: “Hər halda, bizə “Yaxşıyam” dedi”.
Bayram Məmmədovun saxlanma kamerasının dəyişdirilib-dəyişdirilməməsi barədə suala ata “Deyiblər ki, bugünlərdə həll olunacaq” cavabını verib.
NİDA hərəkatının fəalı Bayram Məmmədov saxlanma şəraitinə qarşı etiraz olaraq iyunun 23-də başladığı aclıq aksiyasını iyunun 28-də dayandırıb.
Bayram Məmmədov tualetin yanındakı kameraya yerləşdirilməsinə etiraz olaraq aclıq aksiyasına başlamışdı. O, rəhbərliyin boşalan yerləri məhbuslara pulla satdığını iddia edirdi.
Rəsmi məlumata görə, Bayram Məmmədovdan 3 qrama yaxın, evinə baxış zamanı əlavə olaraq 1 kiloqram 150 qram heroin aşkar edilib. Gənc fəal Ağır Cinayətlər Məhkəməsinin hökmü ilə 10 il azadlıqdan məhrum edilib.
Amma Bayram Məmmədov Qiyas İbrahimovla birlikdə 2016-cı ilin mayında keçmiş prezident Heydər Əliyevin heykəlinə etiraz şüarları yazdıqlarına görə həbs edildiklərini və işgəncələrə məruz qaldılarını bildirirlər.
“Amnesty İnternational” təşkilatı Bayram Məmmədov və Qiyas İbrahimovu vicdan məhbusu kimi tanıyıb.
