Əfqanıstan prezidenti Əşrəf Qani Dehliyə səfəri zamanı Vaşinqtonun yeni Cənubi Asiya strategiyasında müharibədən sarsılmış ölkədə iqtisadi sabitlik və inkişaflar üçün Hindistanın yardımının vacibliyini qeyd edib.
Qani çıxışı zamanı Pakistanı terror hücumlarına görə günahlandıraraq, sülh təşəbbüslərinin heç bir nəticə vermədiyini deyib.
"Pakistanla sülh təşəbbüsləri bizim çalışmağımıza baxmayaraq, təəssüflər olsun ki, baş tutmayıb. Biz sülh və dialoq əlimizi uzatdıq. Yalnız gördüyümüz münaqişə və kəskinləşən münaqişə oldu”, deyə Əfqanıstanın dövlət başçısı bildirib.
Qaninin səfəri ABŞ dövlət katibi Reks Tillersonla görüşündən sonraya təsadüf edir.
Tillerson səfəri zamanı qeyd edib ki, Dehlinin iqtisadi fəaliyyəti Əfqanıstanın gələcəyi üçün doğru mühit yaratmağa müsbət təsir göstərəcək.