10,000-ə yaxın müxalifət tərəfdarı Ermənistan paytaxtında küçələrə çıxaraq hökumət əleyhinə nümayişlərin üçüncü ildönümünü qeyd edib. Yerevanda keçirilən nümayişdə sabiq prezident Levon Ter-Petrosyan nitq söyləyib. Cənab Ter-Petrosyan Erməni Milli Konqresinin rəhbəridir.
2008-ci il martın 1-də Yerevanda təhlükəsizlik qüvvələri ilə nümayişçilər arasında baş vermiş toqquşmada 10 adam həlak olmuşdu. İğtişaşlar Serj Sarkisyanın prezident seçildiyi seçkilərdən sonra baş qaldırmışdı.
Nümayişçilər həlak olanların portretlərini əllərində tutaraq günahkarların cəzalandırılmasını tələb ediblər.
