AXCP-nin həbsdə olan üzvlərindən Fuad Əhmədliyə verilmiş 4 illik cəza hökmü ilə bağlı ölkə daxilində şikayət veriləcək məhkəmə instansiyası qalmayıb. Belə ki Ali Məhkəmə də martın 6-da gənc fəalın işinə baxıb və hökm dəyişdirilmədən qüvvədə saxlanılıb.
Kassasiya şikayətinə baxılarkən Fuad Əhmədli özü iştirak etməyib. Vəkili Əsabəli Mustafayev onun barəsindəki cinayət işinin qondarma olduğunu deyib. O bildirib ki, "Nar Mobile"da adi operator işləmiş, heç bir qərarvermə səlahiyyəti olmayan Fuad Əhmədlinin vəzifəli şəxs kimi təqdim olunub, ona ağır cəza verilməsi absurddur.
Əsabəli Mustafayev hüquqlarını müdafiə etdiyi şəxsin günahsız olduğunu söyləyib, onun barəsində cinayət işinə bəraətverici əsaslarla xitam verilməsini istəyib.
İmran Hacıqayıbovun sədrlik etdiyi hakimlər kollegiyası qısa müşavirədən sonra kassasiya şikayətinin təmin olunmadığını elan edib.
Gənc fəalın atası Zəfər Əhmədli AzadlıqRadiosuna bildirib ki, Ali Məhkəmənin qərarını alandan sonra Avropa Məhkəməsinə şikayət göndəriləcək: "Fuadın həbs olunması haqda qərardan şikayət xeyli vaxtdır Avropa Məhkəməsinin icraatındadır. Hökmdən şikayəti də yaxın vaxtlarda göndərəcəyik".
Xatırlatma
Fuad Əhmədli 2016-cı il avqustun 17-də saxlanılıb. İttihama görə, o, işlədiyi "Azerfon" şirkətində texniki vasitələrdən istifadə etməklə, bir sıra müştərilər haqda fərdi məlumatları kənar şəxslərə ötürüb. Həmçinin iddia olunur ki, Fuad Əhmədlinin həbsindən sonra onun yaşadığı evdə aparılan axtarış nəticəsində ABŞ-da yaşayan ilahiyyatçı Fətullah Gülənə aid materiallar olan disklər, kitablar tapılıb.
Fuad Əhmədli Cinayət Məcəlləsinin 302.1 (əməliyyat-axtarış fəaliyyəti haqqında qanunvericiliyi pozma) və 308.1 (vəzifə səlahiyyətlərindən sui-istifadə) maddələri ilə ittiham olunurdu.
Bakı Ağır Cinayətlər Məhkəməsinin hökmü ilə ona 4 il həbs cəzası verilib.
Fuad Əhmədli ittihamları rədd edir və siyasi baxışlarına görə siyasi sifarişlə həbs olunduğunu bildirir.
